पुन्हा गजबजले साधुग्राम
म. टा. वृत्तसेवा, पंचवटी
सिंहस्थ कुंभमेळ्यानंतर मराठा क्रांती मोर्चाच्यावेळी आणि त्यानंतर पंतप्रधान नरेंद्र मोदी यांच्या सभेमुळे गुरुवारी साधुग्राम पुन्हा गजबजले. दुपारी बारा वाजता होणाऱ्या या सभेसाठी नाशिकसह विविध भागातून आलेल्यांच्या गर्दीने कुंभनगरी फुलून गेली. शहरी तसेच ग्रामीण भागातून आलेल्या नागरिकांसह युवक-युवतींचाही समावेश मोठ्या प्रमाणात होता.
सभास्थळाकडे सकाळपासूनच नागरिकांची रिघ लागली होती. दुपारी दोननंतरही नागरिक वाहनातून तसेच पायी येत होते. तपोवनाच्या मुख्य रस्त्यावरून येणाऱ्यांची गर्दी आणि बंदोबस्तासाठी आलेल्या पोलिसांमुळे या परिसरात पुन्हा सिंहस्थ कुंभमेळ्यासारखे वातावरण तयार झाले होते. औरंगाबाद नाक्याकडून, जनार्दनस्वामी आश्रमाकडून तसेच बडा लक्ष्मीनारायण मंदिराकडून नागरिक मोठ्या संख्येने पायी सभा स्थळाकडे जात होते.
भाजपचे आमदार तसेच इच्छुक उमेदवार यांनी आपापल्या परीने गर्दी करण्यासाठी प्रयत्न केले होते. त्यासाठी सभेला घेऊन येणाऱ्यांना खास वाहनांची व्यवस्थाही त्यांच्याकडून करण्यात आलेली होती. सकाळपासून लहान मुलांसह महिला आणि पुरुष नियोजित जागी वाहनांच्या प्रतीक्षेत थांबलेली होती. इच्छुकांनी वाहनांना आपल्या नावाचे बॅनर लावलेले होते. सभा सुरू झाल्यानंतरही अशी वाहने येत होती. पार्किंगच्या जागेवर वाहने पार्क करून त्या वाहनातून आलेल्यांना सभेच्या ठिकाणी नेण्यात येत होते.
----
रेनकोट, छत्री नेण्यास मज्जाव
बुधवारी रात्री जोरदार पाऊस पडल्याने सभेला जाणारे अनेकजण रेनकोट व छत्री घेऊन जात होते. मात्र, त्यांना अशा वस्तू नेण्यास मज्जाव करण्यात येत असल्यामुळे पोलिस आणि नागरिक यांच्यात वाद होत होते. सभेला येणाऱ्यांची दोन-तीन ठिकाणी तपासणी केली जात असताना पहिल्याच ठिकाणी जर कोणत्या वस्तू नेण्यात मनाई आहे हे सांगितले असते तर त्या वस्तू ठेवण्यासाठी पुन्हा ये-जा करण्याची गरज पडली नसते असे ज्या नागरिकांना परत बाहेर येण्याची वेळ आली ते सांगत होते.