म. टा. प्रतिनिधी, नाशिक
भारतीय संतपटांतील सर्वोत्कृष्ट चित्रपट म्हणून गौरव झालेला 'संत तुकाराम' खास आषाढी एकादशी निमित्त सोमवार २३ जुलै रोजी सायंकाळी ६ वाजता कुसुमाग्रज प्रतिष्ठानतर्फे दाखविण्यात येणार आहे. प्रभात फिल्म कंपनी निर्मित 'संत तुकाराम' (१९३६) या चित्रपटात विष्णूपंत पागनीस, गौरी, मास्टर छोटू, बी. नांद्रेकर, शांता मुजूमदार यांच्या भूमिका असून संगीत केशवराव भोळे यांचे आहे. विष्णूपंत दामले आणि साहेबमामा फत्तेलाल यांनी दिग्दर्शन केलेल्या या चित्रपटातील गीते शांताराम आठवले यांची आहेत. संत तुकाराम यांच्या मूळ अभंगाचाही यात समावेश करण्यात आला आहे. 'संत तुकाराम'मधील 'वृक्षवल्ली आम्हा सोयरी वनचरे' 'आधी बीज ऐकले' 'आम्ही जातो अमुच्या गावा' 'पैल आले हरी' इत्यादी गाणी गाजली होती.
'संत तुकाराम' चे खास वैशिष्ट्य असे की व्हेनिसच्या प्रतिष्ठेच्या 'आंतरराष्ट्रीय चित्रपट महोत्सवा'त 'संत तुकाराम' ला जागतिक तीन सर्वोत्कृष्ट चित्रपटातील एक म्हणून खास गौरविण्यात आले आहे. इंग्लंडच्या केंब्रीज विद्यापीठाच्या चित्रपट अभ्यास मंडळाने 'संत तुकाराम' चे 'मानवतावादावरील प्रभावी चित्रण' अशा शब्दात कौतुक केले आहे.