सारंगखेडा यात्रेचे पुष्करप्रमाणे ब्रँडिंग

पर्यटन विभागाकडून साडेचार कोटी रुपयांचा निधी

म. टा. खास प्रतिनिधी, नाशिक

नंदुरबार जिल्ह्यात भरणाऱ्या सारंगखेडा येथील यात्रेचे ब्रॅण्डिंग राजस्थानातील पुष्करच्या धर्तीवर करण्याचा निर्णय राज्याच्या पर्यटन विभागाने घेतला आहे. त्यासाठी साडेचार कोटी रुपयांचा निधी उपलब्ध करून देण्यात येणार आहे. या यात्रेतील घोडेबाजर देशभर प्रसिद्ध आहे. या यात्रेत महाराष्ट्र, कर्नाटक, गुजरात, पंजाब, आंध्र प्रदेश, उत्तर प्रदेश, राजस्थान या राज्यांतील घोडे विक्रीसाठी येतात.

यात्रेची महती आंतरराष्ट्रीय स्तरावर जावी यासाठी त्याचे ब्रॅण्डिंग केले जाणार आहे. सारंगखेडा येथील पुरातन दत्त स्वामी मंदिराच्या यात्रोत्सवात हा घोडेबाजार भरतो. याठिकाणी यात्रेत हिंदी, मराठी चित्रपट कलाकारांचीही आवर्जून उपस्थिती असते. गेल्यावर्षी या यात्रेत तीन हजाराहून अधिक घोडे विक्रीसाठी आले होते. पंधरा दिवसाच्या कालावधीत घोडेबाजारात सुमारे २५ ते ३० कोटींची उलाढाल होत असते. या घोड्यांच्या किमती ४० हजारांपासून सुरू होऊन थेट ४० लाखांपर्यंत असतात. तीन वर्षांपूर्वी यात्रेतील सर्वात जास्त किमतीचा घोडा अहमदनगर जिल्ह्यातील एका डॉक्टरांनी चक्क ५१ लाखांना खरेदी केला होता.

दत्त मंदिरापासून काही अंतरावरच मोकळ्या जागेत दरवर्षी हा घोड्यांचा बाजार भरत असतो. त्यात देशभरातून आलेल्या घोड्यांमध्ये सर्वात जास्त मागणी पंजाब येथील नुकरा आणि पाच कल्याणी जातीच्या घोड्यांना असते. देवमान, कंठळ, जयमंगल, पद्म, शामकर्ण, काळा पाच कल्याणी हे गुणवान घोडे सर्वांत मोठ्या प्रमाणावर नागरिक खरेदी करतात. तसेच त्यांच्या नाकावर पाढंरे चट्टे, दोन भवरी असलेले, पोटाखाली भवरा असलेले, गळ्यावर भोवरा असलेल्या घोड्यांनाही मागणी असते.