जुगार खेळणारे १५ जण ताब्यात

शहर पोलिसांनी सातपूर गावातील खोका मार्केटमध्ये शुक्रवारी दुपारी जुगार अड्ड्यावर छापा टाकत मुद्देमालासह जुगार खेळणाऱ्या १५ जणांना ताब्यात घेतले आहे. यापुढेही जुगार वा रोलेट गेमचे अड्डे कुणी चालवीत असेल तर नागरिकांनी ९०७५०११२२२ या व्हॉटसअॅपवर मेसेजद्वारे तक्रार करावी, असे आवाहन पोलिस उपायुक्त धिवरे यांनी केले आहे.

पोलिसांनी उघड्यावर मद्य पिणाऱ्यांवरदेखील थेट मोहीम हाती घेतली आहे. याशिवाय अवैध धंद्यांनाही पोलिसांनी लक्ष्य केले आहे. पोलिस उपायुक्त धिवरे यांना शुक्रवारी मिळालेल्या माहितीनुसार सातपूर गावातील खोका मार्केटमध्ये जुगाराचा अड्डा सुरू असल्याचे कळाले. पोलिसांनी दुपारी एक वाजेच्या सुमारास जुगार अड्डावर धिवरे यांनी छापा टाकला. यावेळी १५ जण जुगार खेळतांना आढळून आले. त्यांच्याकडून २ लाख ३५ हजार २३० रुपयांचा मुद्दमाल जप्त करण्यात आला. जुगार अड्डाचालक सैय्यद रौफ याच्यासह जैउद्दीन खतीब, अशोक ठाकूर, विनायक जाधव, शरद गुंजाळ, पन्ना पवार, योगेश दातार, राम पंडित, उमेश जाधव, अनिल गुंजाळ, सुनील वाघ, संजय घुगे, लखन पुराणिक, किरण आहेर, कासिम सैय्यद यांना सातपूर पोलिसांनी ताब्यात घेतले. त्यांच्यावर कारवाई करण्यात आल्याने सातपूर परिसरातील नागरिकांनी समाधान व्यक्त केले आहे.