म. टा. प्रतिनिधी, नाशिक
इगतपुरीतील विपश्यना केंद्रात मनशांतीसाठी येणाऱ्या साधकांना आता गोळीबाराचे आवाज ऐकावे लागणार नाहीत. पिंपळद येथे गोळीबार मैदानासाठी उपलब्ध करून देण्यात आलेल्या जागेवर पोलिस चौकी आणि विश्रांतीकक्षाच्या उभारणीसाठी जिल्हा नियोजन समितीद्वारे निधी पुरविण्याचा निर्णय घेत जिल्हाधिकाऱ्यांनी या वादावर अखेर पडदा टाकला आहे.
इगतपुरीत जागतिक ख्यातीचे विपश्यना केंद्र आहे. तेथून जवळच ग्रामीण पोलिस दलाचे गोळीबार प्रात्यक्षिक मैदान होते. पोलिस कर्मचारी या मैदानावर गोळीबाराचा सराव करीत असत. परंतु, या सरावाचा त्रास विपश्यना केंद्रात येणाऱ्या साधकांना होत असल्याने हे सरावाचे ठिकाण पोलिसांनी बदलावे, अशी मागणी विपश्यना केंद्र २००० पासून करीत आहे. मध्यंतरीच्या काळात विपश्यना केंद्राने पोलिस दलासाठी पिंपळद येथे अडीच हेक्टर जागा उपलब्ध करून दिली. जिल्हा प्रशासनानेही पाच हेक्टर जागा दिल्याने इगतपुरीतील हे केंद्र पिंपळद येथे स्थलांतरीत करण्यात आले. इगतपुरीतील ६८ गुंठे जागेसह पिंपळद येथे पोलिस चौकी आणि विश्रांतीकक्ष उभारून देण्याच्या मागणीवर ग्रामीण पोलिस अडून बसले होते. विपश्यना केंद्र त्याबाबत फारसे उत्सुक नसल्याने तिढा निर्माण झाला होता.
जिल्हाधिकारी राधाकृष्णन बी. यांनी याबाबत गुरुवारी बैठक घेतली. पिंपळद येथे पोलिस चौकी तसेच विश्रांती कक्षाचा ग्रामीण पोलिसांचा प्रस्ताव जिल्हा नियोजन विभागाकडे सादर करा, अशा सूचना जिल्हाधिकाऱ्यांनी ग्रामीण पोलिस दलाच्या अधिकाऱ्यांना दिल्या. जिल्हा नियोजन विभागाकडे असलेल्या निधीमधून हे काम पूर्ण करून दिले जाईल, असे आश्वासन त्यांना देण्यात आले. जिल्हाधिकाऱ्यांनी मध्यस्थी करीत पुढाकार घेतल्याने या वादावर पडदा पडण्यास मदत झाली आहे.