म. टा. वृत्तसेवा, जेलरोड
जेलरोडच्या पुरुषोत्तम शाळेतील कला शिक्षक अंबादास नागपुरे यांच्या चित्रांचे प्रदर्शन नाशिकरोड येथील पु. ना. गाडगीळ अॅण्ड सन्सच्या शिखरेवाडी शाखेच्या आर्ट गॅलरीमध्ये भरणार आहे. नाशिक शिक्षण प्रसारक मंडळाचे कार्याध्यक्ष महेश दाबक व सचिव ज्ञानेश्वर कुलकर्णी यांच्या हस्ते मंगळवारी (दि. ११) सायंकाळी सहाला उद्घाटन होईल. प्रदर्शन ३१ डिसेंबरपर्यंत खुले असेल.
प्राचार्य प्र. ला. ठोके, शाळा समिती अध्यक्ष जयंत मोंढे, वसंत जोशी, चित्रकार प्रफुल्ल सावंत, नाशिक कलानिकेतनचे अध्यक्ष रघुनाथराव कुलकर्णी यांची प्रमुख उपस्थिती राहील. प्रदर्शनात जलरंग व तैलरंग माध्यमातील निसर्गचित्रांचा समावेश असून चित्रांमधील प्रतिबिंबाचे सौदर्य टिपण्याचा प्रत्यन कला शिक्षक नागपुरे यांनी केला आहे. संस्थेचे माजी विद्यार्थी महान चित्रकार एम. एस. जोशी, शिवाजी तुपे यांनीही चित्रकला क्षेत्रात नावलौकिक मिळविलेला आहे. त्यांनाच आदर्श मानून नागपुरेंची कला क्षेत्रात घौडदौड सुरू आहे.
नागपुरे यांनी अनेक राष्ट्रीय व राज्यस्तरीय चित्र प्रदर्शनात आविष्काराचा ठसा उमटवला आहे. चित्रकला क्षेत्रातील अनेक पुरस्कार त्यांना प्राप्त झालेले आहेत. नाशिक कला निकेतनचे ते विद्यमान सदस्य आहेत. नागपुरे यांनी नाशिक कलानिकेतन व सर जे. जे. स्कूल ऑफ आर्ट येथे चित्रकलेचे प्रशिक्षण घेतले.