म. टा. खास प्रतिनिधी, नाशिक
भाजपकडून जिल्ह्यातील १५ विधानसभा मतदारसंघांतील इच्छुकांच्या मुलाखती घेण्याचे नियोजन असतानाच भाजपचा मित्रपक्ष शिवसेनेही निवडणुकीची मोर्चेबांधणी सुरू केली आहे. विधानसभा निवडणुकीच्या पार्श्वभूमीवर पक्षीय कामकाजाचा आढावा घेण्यासाठी शिवसेनेचे उत्तर महाराष्ट्र संपर्कप्रमुख तथा खासदार संजय राऊत दोन दिवस नाशिकमध्ये मुक्काम ठोकणार आहेत.
विधानसभा मतदारसंघांतील पक्षाच्या स्थितीचा आढावा घेण्यासह विविध विकासकामांचे भूमिपूजनही राऊत यांच्या हस्ते होणार आहे. त्यामुळे शिवसेनेकडूनही विधानसभा निवडणुकीचा बिगूल फुंकला जाणार आहे. विधानसभा निवडणूक अवघ्या दीड महिन्यावर येऊन ठेपली असून, त्यासाठी भाजप आणि शिवसेनेकडून मोर्चेबांधणी सुरू करण्यात आली आहे. भाजपकडून जिल्ह्यातील १५ मतदारसंघांतील इच्छुकांच्या मुलाखती बुधवारपासून घेतल्या जाणार असल्याने शिवसेनाही सावध झाली आहे. त्यामुळे शिवसेनेकडूनही आता विधानसभेसाठीची मोर्चेबांधणी सुरू झाली आहे. शिवसेनेचे उत्तर महाराष्ट्र संपर्कप्रमुख संजय राऊत यांच्या उपस्थितीत नाशिकमधील पक्षाच्या मतदारसंघनिहाय स्थितीवर बुधवारपासून मंथन केले जाणार आहे. राऊत दोन दिवस नाशिक जिल्ह्याच्या दौऱ्यावर असून, आज, बुधवारी (दि. ४)सकाळी १० वाजेपासून पक्षाच्या पदाधिकाऱ्यांची बैठक होणार आहे. या बैठकीत जिल्ह्यातील १५ विधानसभा मतदारसंघनिहाय स्थितीचा आढावा घेतला जाणार आहे. सोबतच प्रमुख पदाधिकाऱ्यांशीही चर्चा केली जाणार आहे. दुपारी नाशिकरोड विभागातील विविध विकासकामांचे भूमिपूजन राऊत यांच्या हस्ते होईल. त्यानंतर गुरुवारी (दि. ५) राऊत यांच्या उपस्थितीत नाशिक पश्चिम मतदारसंघातील विविध विकासकामांचे उद्घाटन होणार आहे.
--
नाशिक पश्चिमवर जोर
राऊत यांच्या उपस्थितीत जिल्ह्यातील १५ मतदारसंघांचा आढावा घेतला जाणार असला, तरी राऊत यांचा विशेष जोर भाजपच्या ताब्यात असलेल्या नाशिक पश्चिम मतदारसंघावर असणार आहे. गुरुवारी राऊत यांच्या उपस्थितीत येथेच सर्वाधिक विकासकामांचे उद्घाटन केले जाणार आहे. त्यात नगरसेवक सुधाकर बडगुजर यांच्या प्रभागातील सर्वाधिक विकासकामांचा समावेश आहे. बडगुजर यांच्या प्रभाग निधीतील जवळपास आठ कामांचे भूमिपूजन आणि उद्घाटन होणार आहे. त्यामुळे विधानसभेसाठी बडगुजर यांची दावेदारी प्रबळ होणार असून, त्या दावेदारीला राऊतांकडूनही जोर लावला जाणार असल्याची चर्चा आहे.