शिवथाळी दृष्टिपथात... नाशिकमध्ये चार ठिकाणी आस्वाद

म. टा. खास प्रतिनिधी, नाशिक

गरिबांना अल्प दरात पोटभर जेवण मिळावे, यासाठी जिल्ह्यात प्रजासत्ताकदिनी शिवथाळी योजनेचा शुभारंभ होणार आहे. जिल्ह्यात चार ठिकाणी शिवथाळी भोजन उपलब्ध होणार असून यातील तीन ठिकाणे शहरातील आहेत. तर मालेगावात एका ठिकाणी या थाळीच्या माध्यमातून १० रुपयात जेवण उपलब्ध करून देण्यात येणार असल्याची माहिती जिल्हा प्रशासनाने दिली आहे.

गरिबांना पोटभर अन्न मिळावे, या हेतूने अवघ्या १० रुपयांत जेवण देण्याची घोषणा मुख्यमंत्री उद्धव ठाकरे यांनी विधानसभा निवडणूक काळात केली होती. १० रुपयांत पोटभर जेवण देणे हल्ली अशक्य आहे. तरीही गरीबांना १० रुपयांत जेवण दिले जाणार असून ही थाळी पुरविणाऱ्यांना मात्र एका थाळीसाठी ५० रुपये सरकारकडून अदा केले जाणार आहेत. महाविकास आघाडीच्या माध्यमातून सरकार स्थापन करणाऱ्या ठाकरे यांनी वचननाम्यातील या योजनेच्या अंमलबजावणीला प्राधान्य दिले दिले आहे. त्यानुसार, जिल्हा प्रशासनाने जिल्ह्यात पहिल्या टप्प्यात चार ठिकाणी ही थाळी उपलब्ध करून देण्याची तयारी सुरू केली आहे. यापैकी तीन ठिकाणे नाशिक शहरात तर एक ठिकाण मालेगावात आहे. यामध्ये जिल्हाधिकारी कार्यालयातील महसूल कर्मचारी संघटनेच्या कॅन्टीनमध्ये शिवथाळी उपलब्ध करून देण्याचे निश्चित करण्यात आले आहे. याशिवाय नाशिकरोड परिसरातील दीपक हॉटेल, पंचवटीतील बाजार समितीजवळील बळीराजा हॉटेलमध्ये बचतगटाच्या माध्यमातून गरिबांना १० रुपयांत जेवण मिळू शकणार आहे. याशिवाय मालेगावातही बाजार समिती परिसरात साई श्रद्धा बचत गटाला १० रुपयांत जेवण पुरविण्याचे काम देण्यात आल्याची माहिती जिल्हा प्रशासनातील सूत्रांनी दिली आहे. या प्रत्येक ठिकाणी दररोज १५० थाळी पुरविण्यात येणार आहेत. म्हणजेच जिल्ह्यात सुरूवातीच्या टप्प्यात दररोज ६०० गरीबांना या जेवणाचा लाभ मिळू शकणार आहे.

लाभार्थीच्या फोटोसाठी अॅप

शिवथाळीचा आस्वाद घेण्यासाठी दुपारी १२ ते २ ही वेळ निश्चित करून देण्यात आली आहे. यासाठी एक अॅप विकसित करण्यात आले असून थाळीचा लाभ घेणाऱ्या व्यक्तीचा फोटो या थाळीवर अपलोड केला जाणार आहे. दारिद्र्य रेषेखालील लोकांनाच या थाळीचा लाभ द्यावयाचा असून त्याकरीता शिधा पत्रिकेचाही निकष लावण्यात येणार असल्याचे संकेत जिल्हा प्रशासनाने दिले आहेत. सरकारी कर्मचाऱ्यांना या थाळीचा लाभ घेता येणार नाही, याची दक्षता प्रशासन घेत आहे. याशिवाय अन्नाचा दर्जा राखला जावा, याकरीता प्रशासनाकडून ही थाळी पुरविणाऱ्या ठिकाणांची तपासणी देखील केली जाणार आहे.

येथे मिळणार थाळी

महसूल कर्मचारी कॅन्टीन, जिल्हाधिकारी कार्यालय, नाशिक

बळीराजा हॉटेल, बाजार समितीजवळ, पंचवटी

दीपक हॉटेल, नाशिकरोड

बाजार समिती परिसर, मालेगाव