म. टा. प्रतिनिधी, नाशिक
किर्लोस्कर वसुंधरा आंतरराष्ट्रीय चित्रपट महोत्सवात नाशिककरांना लघुपटांची पर्वणी लाभणार आहे. औष्णिक ऊर्जा प्रकल्प, एकलहरे येथे महोत्सवाचे उद्घाटन मंगळवारी (दि. २७) सकाळी ११ वाजता वसुंधरा पुरस्कारांच्या वितरण समारंभाने होणार आहे.
राष्ट्रीय पुरस्कार विजेत्या द वर्ल्डस् मोस्ट फेमस टायगर या नल्लामुत्थू दिग्दर्शित माहितीपटाच्या प्रदर्शनाने महोत्सवाची सुरुवात केली जाणार आहे. 'मविप्र'च्या समाज कार्य महाविद्यालयात दुपारी तीन वाजता समीर बोंदार्डे यांच्या मार्गदर्शनाखाली छायाचित्रण कार्यशाळा तर विश्वास बँक, सावरकर नगर येथे सायंकाळी सहा वाजता छायाचित्र प्रदर्शनाचे उद्घाटन होईल. विश्वास बँक येथे ट्रान्सफॉर्मर ऑफ एनर्जी, अघनाशिनी ब्लू बुल्स : सर्चिंग फॉर सोल्युशन, ग्रॅण्डमाज फॉरेस्ट अशा लघुपट माहितीपटांचे प्रदर्शन होईल.
कॉलेजरोडवरील धन्वंतरी इन्स्टिट्यूट ऑफ डिझाईन अॅण्ड टेक्नॉलॉजीमध्ये बुधवार (दि. २८) प्लास्टिक प्रदूषणावर मात या विषयावर चर्चासत्र होईल. तर शहर आणि जिल्ह्यातील विविध शाळांत माहितीपट आणि चित्रपटांचे प्रदर्शन होईल. प्लास्टिक विरहित दिवस शहरात गुरुवारी (दि. २९) पाळला जाणार आहे. याच दिवशी गाजरवाडी येथील जिल्हा परिषद शाळेत माहितीपटांचे प्रदर्शन कले जाईल. चांदशी येथील अशोका ग्लोबल स्कूल येथे शुक्रवारी (दि. ३०) विद्यार्थ्यांसाठी चित्रकला स्पर्धा होईल. अंबड येथील किर्लोस्कर ऑइल इंजिन कंपनीच्या कॅम्पसमधील अस्मिता हॉलमध्ये विविध कार्यक्रमांच्या संदर्भातील पारितोषिक वितरण होऊन महोत्सवाचा समारोप करण्यात येणार आहे.