परफॉर्मन्स चौकटी
सूरमयी वातावरणात प्रेक्षक दंग
स्पर्धेच्या सिटी फिनालेमध्ये 'मेरे ढोलना सून, लैला मै लैला' यासारखी प्रसिद्ध गाणी सादर केले. टॅलेंट राउंडमध्ये स्पर्धकांमध्ये दडलेली गायिक प्रेक्षकांसमोर आल्याने स्पर्धेचे संपूर्ण वातावरण सूरमयी झाले. त्याचप्रमाणे स्पर्धकांनी 'येऊ कशी कशी मी नांदायला, लटपट लटपट तुझं चालणं' लोकप्रिय गाणे सादर करून प्रेक्षकांबरोबरच परीक्षकांनादेखील ठेका धरायला लावले.
---
हृदयस्पर्शी अभिनयाने जिंकली मने
सिटी फिनालेमध्ये वैष्णवी लोकनार हिने 'शांतता कोर्ट चालू आहे' या नाटकातील प्रसंग सादर केला. मनाली देवरे हिने सामाजिक विषयावरील प्रसंग सादर केला. निकिता वडनेरेने विधवा शेतकरी महिलेची कैफियत मांडणारे पात्र सादर केले. शेतकरी आत्महत्या विषय गंभीरपणे हाताळत प्रेक्षकांची दाद मिळवली. सती जाण्याची प्रथा बंद करण्याचा प्रसंग कीर्ती मोरेने अभिनयातून सादर केला.
---
नृत्याचे बहारदार सादरीकरण
स्पर्धेच्या सिटी फिनलेमध्ये 'दमलेल्या बाबाची या कहाणी तुला' या गाण्यावरील नृत्याने उपस्थितांना भावूक केले. अनुजा माहेश्वरी हिने 'अप्सरा आली' या गाण्यावर बॅले डान्स सादर केला. 'वाजले की बारा' यासारखे लावणी नृत्यप्रकार सादर करत स्पर्धकांनी प्रेक्षकांची मने जिंकली. त्याचप्रमाणे इंडो-वेस्टर्न प्रकारात बहारदार नृत्याचे सादरीकरण करण्यात आले. प्रीती पुरी व रश्मी जोधानी यांनी पारंपरिक तांडव नृत्य सादर केले. स्पर्धकांनी टॅलेंट राउंडमध्ये लोकप्रिय मराठी व हिंदी गाण्यांवर नृत्य सादर केले. माधुरी रावतच्या राजस्थानी नृत्य प्रकाराने कार्यक्रमात बहार आणली.
---
पेंटिंगद्वारे महिला स्वातंत्र्यावर भाष्य
जयश्री सोनवणे हिने आजच्या काळातील महिलांच्या अभिव्यक्ती स्वातंत्र्यावरील विषयांवरील कॅनव्हास पेंटिंग साकारले. विविध स्तरावर महिलांना प्रगती करण्यासाठी प्रोत्साहन दिले जाते, त्यांच्यातील कलागुण दाखवण्यासाठी स्वतंत्र व्यासपीठ उपलब्ध करून देण्यात येते अशा आशयाचे कॅनव्हास पेंटिंग साकारण्यात आले.
---
गणेशवंदना, कथक अन् बॉलिवुड
कार्यक्रमाची सुरुवात सुप्रसिद्ध नृत्यांगना कीर्ती भवाळकर यांच्या शिष्यांनी गणेश वंदनेने केली. 'ओंकार अनादी अनंत' या गीतावर भावपूर्ण अशी गणेश वंदना सादर केली. याला प्रेक्षकांमधून टाळ्यांच्या स्वरुपात दाद मिळाली. यानंतर 'श्रावणक्वीन २०१७'ची फर्स्ट रनरअप तन्वी खर्डे हिने 'बाजे रे मुरलिया बाजे' या गीतावर कथक नृत्य सादर करून प्रेक्षकांना मंत्रमुग्ध केले. तसेच चिन्मय उदगीरकर व नुपूर सावजी या दोघांनी प्रेक्षकांना झिंगाट गाण्यावर मनमुरादपणे थिरकण्यास प्रवृत्त केले. यामध्ये लहानांपासून मोठ्यांपर्यंत सगळ्यांचा समावेश होता. दुसऱ्या राउंडच्या शेवटी नवीन डान्स अॅकॅडमीच्या विद्यार्थ्यांनी हिपपॉप अॅण्ड बॉलिवुड हे नृत्यप्रकार सादर केले.
---
प्रेक्षक म्हणतात...
सौंदर्य आणि बुद्धिमत्ता यांचा मिलाफ असणाऱ्या 'श्रावणक्वीन' या स्पर्धेतून नाशिकच्या मुलींच टॅलेंट या निमित्ताने लोकांसमोर येत आहे. रॅम्प वॉक, सादरीकरण, प्रश्नोत्तरे यातून तरुणींचा उत्साह, मेहनत, जिद्द, आत्मविश्वास दिसून आला. मॉडेलिंग आणि मनोरंजन क्षेत्रात जाण्यासाठी नाशिकच्या मुलींसाठी श्रावणक्वीन हे एक उत्तम व्यासपीठ आहे.
- पूर्वा सावजी, प्रेक्षक
----
मी 'मटा'चा जुना वाचक आहे आणि दरवर्षी होणाऱ्या या स्पर्धेतून नाशिकच्या मुलींमध्ये असलेलं उत्तम टॅलेंट समोर येत आहे. ही स्पर्धा फक्त सौंदर्याची नसून व्यक्तिमत्त्व खुलवण्यासाठी एक उत्तम व्यासपीठ आहे. ही स्पर्धा बघून एक गोष्ट लक्षात आली की मुंबई पुण्याच्या तोडीस तोड नाशिकच्या मुली आहेत. आनंदाची गोष्ट म्हणजे माझी मुलगी यावर्षी श्रावणक्वीन झाली. पण स्पर्धा बघून सगळ्या मुलींची मेहनत दिसून आली. श्रावणक्वीनसारख्या सौंदर्य आणि बुद्धिमत्तेच्या जोरावर असलेल्या स्पर्धेतून शिकून मुली पुढे जात आहेत की खरंच खूप चांगली गोष्ट आहे.
प्रवीण गायकवाड, प्रेक्षक
-----
मुंबई पुण्याबरोबरच 'महाराष्ट्र टाइम्स' नाशिकमध्ये 'श्रावणक्वीन' आयोजित करतात त्यामुळे नाशिकच्या टॅलेंटला अधिक वाव मिळतो. दरवर्षी ही स्पर्धा अधिकच लोकप्रिय होत आहे. नाशिकच्या अधिक मुली यात सहभागी होत आहे ही खरंच खूप कौतुकास्पद गोष्ट आहे. या स्पर्धेद्वारे मराठी सिनेसृष्टीचं दार खुलं होत आहे. त्यासाठी अधिक जिद्दीची, मातृभाषेवर प्रभुत्व, मेहनत करण्याची तयारी जर या मुलींनी कायम ठेवली तर नक्कीच नाशिकच टॅलेंट महाराष्ट्रात चमकेल.
- किरण खर्डे, प्रेक्षक
----
विजेत्या म्हणतात..
'श्रावणक्वीन'चा किताब मला मिळाल्याने खूप आनंदी आहे. सिटी फिनालेसाठी निवडण्यात आलेल्या वीसही स्पर्धक श्रावणक्वीनच आहेत. सर्वांनी खूप कष्ट घेतले होते. सिटी फिनालेत तर श्रावणक्वीन झाले. परंतु, आता महाराष्ट्राची 'श्रावणक्वीन' व्हायचंय. मुंबई देखील गाजवायची आहे. त्यासाठी खूप मेहनत घेणार आहे. मटाने ही संधी आम्हाला उपलब्ध करून दिल्याबद्दल आभार.
- साक्षी गायकवाड, श्रावणक्वीन २०१८
---
'श्रावणक्वीन'च्या या यशाने आईबाबा खूप आनंदी झाले. ज्यावेळी फर्स्ट रनर अप म्हणून माझं नाव घेण्यात आलं त्यावेळी एका मिनिटात सेलिब्रेटी झाल्यासारखं वाटलं. 'श्रावणक्वीन'सारखा खूप मोठा प्लॅटफॉर्म मिळाला. या स्पर्धेच्या माध्यमातून मैत्रिणी मिळाल्या. ग्रुमिंग सेशनमधून मिळालेला आत्मविश्वास खूप काही शिकवून गेला. हा अनुभव कायम स्मरणात राहील.
- अनुजा माहेश्वरी, फर्स्ट रनरअप
---
खूप आनंद होतोय. संपूर्ण कुटुंबीयदेखील खुश झाले आहेत. मॉडेल्स, अभिनेत्री कशा तयार होतात, त्यांच्या यशामागची मेहनत काय असते हे प्रत्यक्ष श्रावणक्वीनमधून अनुभवायला मिळालं. 'मटा'च्या संपूर्ण टीमने यासाठी खूप मेहनत घेतली त्याबद्दल मटाचे धन्यवाद. आता मुंबईत नाशिकचं प्रतिनिधित्व करायचं असल्याने त्यासाठी खूप तयारी करणार आहे.
- प्रीती पुरी, सेकंड रनरअप
-----
टायटल विजेत्या
बेस्ट स्किन - साक्षी गायकवाड
मिस पॉप्युलर - रश्मी जोधानी
मिस टॅलेंटेड - अनुजा माहेश्वरी
बेस्ट वॉक - निकिता वडनेरे
बेस्ट परफॉर्मन्स - साक्षी गायकवाड
बेस्ट स्माइल - जयश्री सोनवणे
बेस्ट आईज - श्यामली शिवलकर
बेस्ट ग्रूम - वेदिका मुठे
वेब क्वीन - जयश्री सोनवणे
बेस्ट हेअर - रिबेका भोसले
००००००००००००००
संकलन : हर्षल भट, लखन सावंत, प्रतीक गंगेले, बागेश्री पारनेरकर, कल्पेश उघडे, स्नेहल अमृतकर, भाग्यश्री मोरे