बर्निंग कारचा महामार्गावर थरार

सिन्नर : नाशिक-पुणे महामार्गावरील हॉटेल वनपीसजवळ मंगळवारी (दि. १४) दुपारी पावणेदोन वाजेच्या सुमारास पुण्याहून नाशिककडे जाणारी फोर्ड फिस्टा कार अचानक पेटल्याने खळबळ उडाली. चालकाच्या प्रसंगावधानामुळे कारमधील सर्व प्रवाशी सुखरुपरित्या बाहेर पडले. मात्र, कार पूर्णतः जळून खाक झाली.

सांगली जिल्ह्यातील इस्लामपूर येथील तानाजी रमेश जाधव व इतर चौघेजण फोर्ड फिस्टा कारने (एमएच १२, डीए ९४४३) पुण्याहून नाशिककडे येत असताना नांदूर शिंगोटे गावच्या दोन किलोमीटर पुढे हॉटेल वनपीस व पेपर मिलच्या जवळ कारने अचानक पेट घेतला. ही बाब कार चालकाच्या लगेच लक्षात आली. त्याने तत्परतेने रस्त्याच्या कडेला कार उभी केली. कारमधील सर्वजण सुखरुप बाहेर पडले. कार पूर्णतः आगीच्या भक्ष्यस्थानी पडली. त्यामुळे आकाशात धुरासह ज्वालांचा लोट निघाल्याने रस्त्याने ये-जा करणारी वाहने थांबल्याने काही काळ वाहतूक ठप्प झाली. त्यानंतर एका बाजूने वाहतूक सुरळीत झाली.