सिन्नर-चांदवड बस वर्षभरापासून बंद

म. टा. वृत्तसेवा, निफाड

सायखेडा येथील गोदावरी नदीवर असलेला धोकादायक पूल अवजड वाहनांसाठी बंद केल्यामुळे गेल्या वर्षभरापासून सिन्नर-चांदवड ही बस बंद आहे. यामुळे सिन्नर-निफाड व निफाड-चांदवड असा प्रवास करणाऱ्या प्रवाशांची गैरसोय होत आहे. करंजगाव व नांदूरमध्यमेशवेर हे दोन पर्यायी मार्ग असूनही महामंडळ ही बस सुरू करीत नसल्याने प्रवाशी व नागरिकांमध्ये संताप व्यक्त होत आहे.

गेल्या अनेक वर्षांपासून सिन्नर-चांदवड ही बस प्रवाशांची सेवा करीत होती. परंतु मागील वर्षी गोदावरीला महापूर आला. त्यात सायखेडा येथील जुना जीर्ण झालेल्या पुलाला धोका निर्माण झाल्याने या पुलावरून जड वाहने नेण्यास सार्वजनिक बांधकाम विभागाने बंदी घातली. तसे पत्र या विभागाने पोल‌िस व एसटी महामंडळाला दिले. त्यानंतर महामंडळाची एकही बस गेल्या वर्षभरात या पुलावरून गेलेली नाही. याच नियमामुळे महामंडळाने सिन्नर-चांदवड ही बस रद्द केली. ही बस बंद होऊन वर्ष उलटले तरी कोणीही राजकीय नेतृत्वाने याची दखल घेतली नाही. ही बस रद्द झाल्याने निफाड व परिसरातून सिन्नर चांदवडकडे जाणाऱ्या प्रवाशांचे प्रचंड हाल होत आहेत. चांदवडला जाण्यासाठी निफाडहून एकही बस नाही. चांदवडला जायचे असेल तर निफाड येथून लासलगाव व तेथून चांदवड असा लांबचा व खर्चिक मार्ग अवलंबवा लागतो.

निफाडला कोणी वालीच नाही!

निफाडचे प्रवासी विविध बसेसच्या मागणीसाठी सातत्याने मागण्या करीत असतात. निफाड रेल्वेस्थानक येथे विशिष्ट रेल्वे थांबवाव्या यासाठी निफाडचे रेल्वे प्रवासी मागण्या करीत असतात. परंतु याप्रश्नी राजकीय नेते कुठलाही उत्साह दाखवीत नसल्याने निफाडकरांमध्ये संताप आणि नाराजी पसरली आहे.