कारला अपघात, पण ४ किलोमीटर अंतरावर आढळला चालकाचा मृतदेह, नग्न अवस्थेत फासावर लटकलेला

नाशिक : जिल्ह्यातील सिन्नर-घोटी महामार्गावर घोरवडजवळ शुक्रवारी रात्रीच्या सुमारास एका कारचा अपघात झाल्याची विचित्र घटना घडली आहे. अपघात स्थळापासून कार चालकाचा मृतदेह सुमारे चार किलोमीटर अंतरावर नग्न अवस्थेत एका रसवंतीच्या शेडमध्ये फासावर लटकलेल्या अवस्थेत आढळून आला आहे. या घटनेने खळबळ उडाली असून घातपाताचा संशय व्यक्त केला जात आहे.

आकाश मोहन खताळे (वय २४, रा. अंबड चिंचाळे) असे मृत कारचालकाचे नाव आहे. घोरवड गावाजवळ रात्रीच्या सुमारास एक कार पुलाच्या कठड्याला धडकून रस्त्याच्या कडेला असलेल्या शेतातील विहिरीजवळ येऊन पडली. या घटनेची माहिती काही स्थानिक नागरिकांनी पोलिसांना कळवल्यानंतर ही बाब उघडकीस आली आहे. पोलिसांना पाचारण करण्यात आल्यानंतर ते घटनास्थळी पोहोचले. पोलिसांनी कारजवळ पाहणी केली. परंतु त्या ठिकाणी कुठलीही व्यक्ती आढळून आली नाही.

दरम्यान, कार चालकाचा शर्ट घटनास्थळाजवळील डोंगराच्या पायथ्याशी सापडला. पण चालकाचा मृतदेह तेथून चार किमी अंतरावर असलेल्या हॉटेल जय भवानी येथे रसवंतीच्या पत्री शेडच्या अँगलला फासावर नग्न अवस्थेत लटकलेला आढळून आला. मृत कार चालक आकाश खताळे हा पांढुर्ली येथे आपल्या नातेवाईकांकडे आला होता, अशी प्राथमिक माहिती मिळाली आहे.
सप्तशृंगी गडावर मोठी घटना, CCTV कॅमेऱ्याला लावला चुना, दानपेटीत जळालेल्या नोटा, काय चाललंय?
लटकलेल्या अवस्थेतील मृतदेह पोलिसांनी खाली उतरवला आणि ग्रामीण रुग्णालयात शवविच्छेदनासाठी पाठवला. त्यांनतर मृतदेह नातेवाईकांच्या ताब्यात देण्यात आला आहे. या घटनेनंतर हा खरंच अपघात आहे की अपघाताचा बनाव करत आत्महत्या केली आहे किंवा अन्य काही घातपात आहे? असे प्रश्न उपस्थित करून घटनेवर संशय व्यक्त केला जात आहे. परिसरात या घटनेच्या चर्चेला उधाण आले आहे. याबाबतचा पुढील तपास पोलीस करत आहेत.