ज्येष्ठ नागरिकांच्या प्रतिकाराने चे स्नॅचरचा डाव उधळला

म. टा. वृत्तसेवा, पंचवटी

नवीन आडगाव नाका परिसरातून रिक्षाच्या प्रतीक्षेत असलेल्या एका ज्येष्ठ नागरिकाला पत्ता विचारण्याचा बहाणा करीत त्याला नादात ठेवण्याचा प्रयत्न केला. आणि त्याच्या गळ्यातील सोन्याची चैन खेचली. मात्र, त्या ज्येष्ठ नागरिकाने प्रतिकार करीत चैनस्नॅचरला काठीने मारल्याने त्याच्या हातून चैन खाली पडली. ते बघून त्या चैनस्नॅचरने पळ काढला. शुक्रवारी (दि. ९) सकाळी पावणे अकराच्या सुमारास हा प्रकार घडला. ज्येष्ठ नागरिकाने दाखविल्या धैर्य आणि प्रतिकाराचे परिसरात कौतुक होत आहे.

नवीन आडगाव नाका परिसरातील स्वामी नारायण नगर येथे राहणारे विश्वनाथ शंकरराव घुगे (वय ८१) हे शुक्रवारी सकाळी पावणे अकराच्या सुमारास घरून निघाले. त्यांना काळाराम मंदिरात दर्शनासाठी जायचे होते. ते घरासमोर रिक्षाच्या प्रतीक्षेत उभे असताना त्यांना त्या परिसरात दुचाकीवर दोन तरुण चकरा मारीत असल्याचे दिसले. दोन-तीन चकरा मारल्यानंतर ते दोघे घुगे यांच्याजवळ आले, त्यांनी आम्ही फायनान्स कंपनीकडून आलो असून, शिंदे कुठे राहतात अशी विचारणा केली. त्यावर घुगे यांनी शिंदे याठिकाणी राहत असल्याची खूण सांगितली. त्यानंतर त्या तरुणांनी मागचा बंगला कुणाचा असे विचारले. यासाठी घुगे यांनी मागे वळून बघताच त्या संधीचा फायदा घेत दुचाकीवरच्या एकाने घुगे यांच्या गळ्यातील सात तोळे वजनाची सोन्याची चैन ओढली. घुगे यांच्या लक्षात येताच त्यांच्या हातात असलेल्या काठीने त्याला मारण्यास सुरुवात केली आणि दुसऱ्या हाताने दुचाकीचा हॅण्ड धरला, त्या झटापटीत संशयितांनी चोरलेली चैन खाली पडली. त्या संशयितांनी लगेच तेथून पळ काढला. या घटनेची माहिती आडगाव पोलिसांना कळविण्यात आल्यानंतर पोलिस उपायुक्त लक्ष्मीकांत पाटील, सहाय्यक पोलिस आयुक्त विजयकुमार चव्हाण, आडगाव पोलिस स्टेशनचे पोलिस निरीक्षक सुनीलकुमार पूजारी यांनी घटनास्थळी भेट देऊन माहिती घेतली. आडगाव पोलिस स्टेशनच्या हद्दीत चेन स्नॅचिंगचे प्रकार वाढले असल्याने नागरिकांमध्ये भीतीचे वातावरण आहे.