म. टा. खास प्रतिनिधी, नाशिक
पोलिस वसाहतीतील वाहनांमधील पेट्रोलचोरी करणाऱ्या भुरटा चोरास पकडून पोलिस पत्नींनी बेदम चोप देत पोलिसांच्या स्वाधीन केले. चोरट्याने केलेला हा प्रयत्न त्याच्या चांगलाच अंगलट आला असून, या प्रकरणी आडगाव पोलिस ठाण्यात गुन्हा दाखल करण्यात आला आहे. अभिषेक राऊत (रा. मेडिकल कॉलेजजवळ) असे संशयिताचे नाव आहे. या प्रकरणी सदाशिव पाटील (रा. पोलिस हौसिंग सोसायटी, आडगाव शिवार) यांनी या प्रकरणी तक्रार दिली आहे. पोलिसांच्या सोसायटीत पेट्रोल चोरीच्या घटना नित्याच्याच झाल्या आहेत. संशयिताने गुरुवारी (दि. २) दुपारच्या सुमारास सोसायटीत पार्क केलेल्या दोन वाहनांमधील पेट्रोल काढले. यानंतर त्याने आणखी एका वाहनांकडे मोर्चा वळविला. या वाहनांतून पेट्रोल काढीत असताना तो सोसायटीतील महिलांच्या हाती लागला. महिलांनी बेदम चोप देत त्यास आडगाव पोलिसांच्या ताब्यात दिले. घटनेचा अधिक तपास हवालदार वसंत पगार करीत आहेत.
अल्पवयीन मुलीची आत्महत्या
नाशिक : औद्योगिक वसाहतीतील घरकुल योजनेत राहणाऱ्या १४ वर्षांच्या मुलीने आपल्या राहत्या घरात गळफास लावून आत्महत्या केली. मुलीच्या आत्महत्येचे कारण स्पष्ट नसले तरी आजारपणास कंटाळून तिने आत्महत्या केल्याचे बोलले जात आहे. या प्रकरणी अंबड पोलिस ठाण्यात आकस्मात मृत्युची नोंद करण्यात आली आहे. मुस्कान गौरव सिंग (१४, रा. घरकुल योजना, अंबड) असे या मुलीचे नाव आहे. गुरूवारी (दि. २) आपल्या राहत्या घरात अज्ञात कारणातून तिने ओढणीच्या सहाय्याने गळफास लावून घेतला होता. तिच्या आत्महत्येचे कारण स्पष्ट नसले तरी ती लहानपणापासून डोकेदुखीच्या दुर्धर आजाराने त्रस्त होती. आजारपणास कंटाळून तिने आत्महत्या केली असावी, अशी शक्यता व्यक्त होत आहे. घटनेचा अधिक तपास हवालदार चव्हाण करीत आहेत.