जावयाकडून सासूसह मेहुणीच्या मुलाची हत्या

सासरा गंभीर जखमी

म. टा. प्रतिनिधी, नाशिक

कौटुंबिक कारणावरून एकाने सासूसह मेहुणीच्या आठ वर्षीय मुलाची हत्या केली. ही घटना आज, गुरुवारी दुपारी साडेतीन वाजेच्या सुमारास रामवाडी परिसरातील निर्जन स्थळी घडली. हल्लेखोर जावई पसार झाला असून पोलिस त्याच्या मागावर आहेत.

मंदाबाई दशरथ खराटे (५५), नैतिक विशाल लिलके (८) असे हत्या झालेल्या व्यक्तींची नावे आहेत. या घटनेचे प्रत्यक्षदर्शी असलेल्या दशरथ खराटे यांनी सांगितले की, म्हसरूळ परिसरातील गंधारवाडी येथे राहणाऱ्या खराटे कुटुंबियांचा जावई असलेला मोतीराम बदादे आज दुपारच्या सुमारास घरी आला. त्याने तिथे सासू मंदाबाई आणि खराटे यांच्या मुलीचा मुलगा नैतिक यास सोबत घेतले. दुचाकीवर बसवून तो त्यांना चोपडा लॉन्सरोडवरील रामवाडी परिसरातील पेट्रोलपंपासमोरील निर्जन ठिकाणी घेऊन गेला. तिथे त्याने धारदार शस्त्राने दोघांचा खून केला. यानंतर तो पुन्हा घरी आला. तिथे त्याने मंदाबाई व नैतिक यांना काहींनी मारहाण करीत लूट केल्याची खोटी गोष्ट सांगितली. या दोघांना वाचवण्यासाठी दशरथ खराटे संशयित आरोपी मोतीराम बरोबर निघाले. मोतीराम त्यांना पुन्हा त्याच ठिकाणी घेऊन आला. खराटे पुढे चालत असताना पाठीमागून मोतीरामने त्यांच्या डोक्यात कोयत्याने वार केला. मोतीराम हल्ला चढवत असताना खराटे यांनी काही वार चुकवले. तसेच रस्त्याला येऊन सरकारवाडा पोलिस स्टेशनच्या दिशेने पळायला सुरुवात केली. या दरम्यान, मोतीराम तेथून पसार झाला. घटनेची माहिती मिळाल्यानंतर सर्वच वरिष्ठ पोलिस अधिकाऱ्यांनी घटनास्थळी धाव घेऊन माहिती घेतली. कौटुंबिक वादातून हा प्रकार घडला असावा, अशी शक्यता पोलिसांनी वर्तवली.