आईला दाखविणार सोनियाचा दिवस!

नाशिक : तिनं कधीही कोणत्या गोष्टीसाठी आईकडं हट्ट धरला नाही; किंबहुना हट्ट धरण्याची परिस्थितीच नव्हती. कधी पोटापुरतं मिळत होतं, तर कधी अर्धपोटीच रहावं लागत होतं. नातेवाईकांनी मदतीला धावून येण्याऐवजी हात वर केले, वडिलाचं छत्र लहानपणीच हरपलं...रहायला घर नाही, भाड्याच्या घरात इतर अडचणीच जास्त. अशावेळी तिनं उचल खाल्ली. या परिस्थितीतून बाहेर पडायचंय असं मनाशी ठरवलं. आईला सोन्याचे दिवस दाखवू या उद्देशानं प्रचंड अभ्यास केला आणि दहावीच्या परीक्षेत उज्ज्वल यश मिळवलं. अशी आहे सोनिका चिंचोलेची कथा. आता तिचं स्वप्न खूप मोठं आहे, तिला चार्टर्ड अकाउंटन्ट व्हायचंय पण तिची ही बिकट शैक्षणिक वाट कशी सुकर होणार या विवंचनेत दोघी मायलेकी आहेत.

सोनिका १३ महिन्यांची असताना तिचं पितृछत्र हरपलं. तिच्या आईनं परिस्थितीला तोंड देत न डगमगता सोनिकाला शिकवून मोठं करायचं असा निश्चय केला. त्यासाठी लागेल ते कष्ट उपसण्याची तयारी ठेवली. सोनिकानं ९१.८० टक्के गुण मिळवून आपल्या आईच्या परिश्रमाचं चीज केलं.