सुरांच्या साथीला तंत्रज्ञानाचा नाद

संगीतकार नाशिकमध्ये आणि वादक अमेरिकेत, ब्रास सेक्शन जर्मनीत आणि गायक मुंबईत ही कल्पना अशक्य वाटते ना? पण हे शक्य झाले आहे. संगीतकार संजय पुणतांबेकर यांनी तंत्रज्ञानाच्या माध्यमातून जगविख्यातांकडून वाद्य वाजवून घेत अनोख्या संगीतरचना तयार केल्या आहेत. त्यांच्या या कल्पकतेने संगीत क्षेत्राला नवा आयाम मिळाला आहे.

नुकताच सैराट हा सिनेमा येऊन गेला. त्यात संगीतकार अजय-अतुल यांनी संगीतबद्ध केलेली गाणी परदेशात जाऊन रेकॉर्ड केली होती; परंतु त्या अगोदरही नाशिकचे संजय पुणतांबेकर हे संगीतकार जगातील सर्वोत्तम अशा आवडत्या वादकांकडून आपल्या गाण्यांना संगीतसाथ मिळवून घेत आहेत. ते म्हणतात, ही पद्धत कमी खर्चाची, परवडणारी व वेळ वाचवणारी आहे. आपल्या कामाच्या पद्धतीविषयी ते म्हणतात, की मी प्रथम गाण्याचा ट्रॅक तयार करून घेतो. त्या ट्रॅकवर कोणत्या वादकाकडून काय वाजवून घ्यायचे याची नोंद करतो. ज्या वादकांकडून जो गाण्याचा तुकडा वाजवून घ्यायाचा आहे, तो तुकडा हार्मोनिअमवर किंवा की-बोर्डवर वाजवून रेकॉर्ड करतो. त्याची वेव्ह फाइल तयार करून संबंधित वादकाला ती मेलद्वारे पाठवून दिली जाते. वादक आपल्या सोयीनुसार तो तुकडा ऐकून त्याचे रेकॉर्डिंग करून तो पुन्हा मला मेल करतो. वादकांनी मेल केलेला गाण्याचा तुकडा मी रेकॉर्डिंगच्या सॉफ्टवेअरवर टाकून गाणे पूर्ण करतो. या सोयीमुळे एकाच वेळी अनेक वादकांकडून हवे ते वाद्य वाजवून घेता येतात. या रेकॉर्ड सिस्टीममध्ये सर्व वादक स्टुडिओत कधीच एकत्र येत नाहीत. याने कामाचे तास कमी होतात. खर्च कमी होतो व आपल्याला हवा तो परिणाम साध्य करता येतो. तयार झालेला ट्रॅक गायकाकडे पाठवला जातो. तेदेखील याच पद्धतीने रेकॉर्डिंग करून पाठवतो. आपल्या गाण्याला कोण वादक होते हे गायकाला समजतही नाही. ज्याच्या-त्याच्या सोयीनुसार मूडनुसार काम करता येते. स्टुडिओच्या कामापेक्षा या कामात जास्त परफेक्शन येते. या माध्यमातून अनेक जिंगल्सही तयार केल्या आहेत. अशाचरीतीने रेकॉर्ड केलेले एका वेगळ्या चित्रपटाचे संगीत महाराष्ट्रातील रसिकांना ऐकायला मिळणार आहे. या गाण्यामध्ये ऑस्ट्रेलियातील एका वादकाने सेक्सोफोन वाजवला आहे, तर इडोनेशियाच्या एका कलाकाराने पियानिका हे वाद्य वाजवले आहे. तुम्हाला वाद्य वाजवता येत असले, परंतु तुम्ही नवीन तंत्रज्ञानाचा अवलंब केला नाही तर तुम्ही मागे पडतात, असाच संदेश पुणतांबेकर यांना यातून द्यायचा आहे.

आजपर्यंत पारंपरिक पद्धतीने अनेक रेकॉर्डिंग वाजवले. गेल्या वर्षीपासून ही पद्धत अवलंबली आहे. त्यामुळे गोंधळ होत नाही व काम करणे सोयीचे होते. आता तर शंभर टक्के काम मी याच पद्धतीने करतो आहे.

- संजय पुणतांबेकर, संगीतकार