क्रीडा महोत्सवाच्या तयारीस सुरुवात

सिन्नरला दि. २६ डिसेंबरपासून रंगणार थरार

म. टा. वृत्तसेवा, सिन्नर

येथील आडवा फाटा परिसरातील मैदानावर नाशिक जिल्हा कबड्डी असोसिएशन व जिल्हा तालिम संघ यांच्या मान्यतेने क्रीडा महोत्सवांतर्गत दि. २६ डिसेंबरपासून जिल्हा परिषद अध्यक्ष चषक कबड्डी स्पर्धा व आमदार चषक कुस्ती स्पर्धा या जिल्हास्तरीय स्पर्धांचा थरार रंगणार आहे. या स्पर्धांसाठी खेळाचे मैदान तयार करण्याच्या कामाचे भूमिपूजन सोमवारी (दि. २०) आमदार राजाभाऊ वाजे, जिल्हा परिषद अध्यक्षा शीतल सांगळे, यांच्या हस्ते करण्यात आले.

नाशिक जिल्हा कबड्डी असोसिएशनचे जिल्हा समन्वयक उदय सांगळे, नगराध्यक्ष किरण डगळे, उपनगराध्यक्ष प्रमोद चोथवे, गटनेते हेमंत वाजे पंचायत समितीच्या सभापती सुमन बर्डे, उपसभापती वेणूबाई डावरे, गटनेते संग्राम कातकाडे, पंचायत समिती सदस्य जगन पाटील भाबड, चिंचोलीचे माजी सरपंच संजय सानप आदी उपस्थित होते. या स्पर्धेतील कामगिरीच्या आधारे नाशिक जिल्ह्याचे पुरूष व महिलांचे संघ निवडणार असून, हे संघ १ ते ४ डिसेंबरदरम्यान कराड, सांगली येथे होणाऱ्या महाराष्ट्र राज्य अजिंक्यपद व निवड चाचणी स्पर्धेत नाशिक जिल्ह्याचे प्रतिनिधित्व करतील.

जिल्हास्तरीय कुस्ती स्पर्धेची निवड चाचणी

नाशिक जिल्हा तालिम संघाच्या वतीने ४० वी कुमार व ६१ वी पुरूष आमदार राजाभाऊ वाजे चषक जिल्हा अजिंक्य व निवड चाचणी कुस्ती स्पर्धा दि. २८ व २९ नोव्हेंबर रोजी होणार असून, पुरूष गट वजन (गादी) १० गट व १० गट (माती) प्रत्येक तालुक्यातून ३० खेळाडु ५० प्रशिक्षक व्यवस्थापक व पंच असतील. तर २८ नोव्हेंबरला दु. ४.०० वाजता वजने होतील तसेच २९ नोव्हेंबरला सकाळी ८.०० वाजता कुस्त्या सुरू होतील. स्पर्धा यशस्वीतेसाठी नाशिक जिल्हा कबड्डी असोसिएशनचे अध्यक्ष आमदार जयंत जाधव, कार्याध्यक्ष राजेंद्र पगारे, सहसचिव महाराष्ट्र राज्य प्रकाश बोराडे, जिल्हा समन्वयक उदय सांगळे, प्रमुख कार्यवाह मोहन गायकवाड, सहकार्यवाह प्रकाश भाबड राज्य संघटनेचे सहकार्यवाह प्रकाश बोर्‍हाडे, विलास पाटील आदी परिश्रम घेत आहेत.


स्पर्धेचे स्वरूप

दिवसा व सायंकाळी प्रकाशझोतात सामने होणार

पुरूषांचे चार तर महिलांचे दोन मैदानात सामने

प्रेक्षकांसाठी ६००० आसनक्षमतेची गॅलरी

तालुक्यातून पुरुषांचे ४८, महिलांचे १८ कबड्डी संघ

कबड्डीचे ७९२ खेळाडूंसह १२० प्रशिक्षक व व्यवस्थापक, ५० पंच, ५० पदाधिकारी सहभागी

स्पर्धेत पुरुषांचे साखळीचे ७२ व बाद पद्धतीचे ११ असे ८९ सामने