भाजप आमदारांनी लाटले नगरसेवकांचे श्रेय; आता पुन्हा भूमिपूजन-उद्घाटने
म. टा. खास प्रतिनिधी, नाशिक
विधानसभा निवडणुकीच्या पार्श्वभूमीवर भाजपच्या तिन्ही आमदारांनी नगरसेवक निधीच्या कामांचे श्रेय लाटून त्या कामांचे परस्पर उद्घाटने, भूमिपूजने उरकल्याचे पडसाद शनिवारच्या स्थायी समितीच्या बैठकीत उमटले. या कार्यक्रमांना नगरसेवकांना निमंत्रित का केले गेले नाही, याचा जाबही यावेळी सदस्यांनी विचारला. नगरसेवकांच्या कामांचे श्रेय त्यांनाच मिळायला हवे, असे सांगत निवडणूकीपूर्वी आमदारांनी परस्पर उरकलेल्या कामांची उद्घाटन, भूमिपूज पुन्हा नगरसेवकांच्या हस्ते करण्याचे आदेश सभापती उद्धव निमसे यांनी प्रशासनाला देत भाजपच्या आजी-माजी आमदारांना दणका दिला आहे.
शनिवारी सभापती निमसे यांच्या अध्यक्षतेखाली पार पडलेल्या स्थायी समितीच्या सभेत निवडणुकीपूर्वी आमदारांनी नगरसेवकांच्या कामांचे श्रेय स्वत: घेतल्याचा मुद्दा उपस्थित करण्यात आला. माजी महापौर तथा अशोक मुर्तडक यांनी हा मुद्दा उपस्थित करत वादाला तोंड फोडले. माझ्या कार्यकाळात मंजूर झालेल्या हनुमानवाडीतील जलकुंभाच्या कामाचे श्रेय आमदारांनी लाटल्याचा आरोप त्यांनी यावेळी केला. विधानसभा निवडणुकीच्या पार्श्वभूमीवर या आमदार महोदयांनी या कामाचे श्रेय लाटण्यासाठी परस्पर जलकुंभाच्या उद्घाटनाचा कार्यक्रम उरकला. महापालिकेचा निधी असताना, आमदारांचा काय संबंध? असा जाब त्यांनी विचारला. इतर सदस्यांनी देखील आमदारांकडून होत असलेल्या अन्यायाचा पाढा यावेळी वाचला. नगरसेवकांच्या कामांचे श्रेय त्यांनाच मिळावे, अशी आग्रही मागणी यावेळी सदस्यांनी केली. आमदारांकडून होणारी विकासकामांची पळवापळवी रोखण्यासाठी कल्पना पांडे यांनी अभिनव सूचना मांडली.
आमदार निधीतून केल्या जाणाऱ्या कामांसाठी संबंधित प्रभागातील नगरसेवकाचे ना हरकत प्रमाणपत्र घेणे संबंधित आमदारांवर बंधनकारक केले जावे, अशी सूचना पांडे यांनी मांडली. सभापती निमसे यांनी देखील पंचवटीतील नाट्यगृहाचे तत्कालिन आमदाराने परस्पर भूमिपूजन उरकल्याचा आरोप केला. या नाट्यगृहासाठी संपूर्ण निधी महापालिकेचा असताना आमदार निधीतून हे काम केले जात असल्याचा दावा करत स्थानिक नगरसेवकांना डावलून या कामाचे भूमिपूजन उरकण्यात आल्याचा प्रकार निमसे यांनी सभागृहाच्या निदर्शनास आणून दिला. यापुढील काळात अशाप्रकारचा श्रेयवाद चालू देणार नाही, असे ठासून सांगत नगरसेवकांनी केलेल्या कामांचे श्रेय नगरसेवकांना मिळायला हवे. त्यामुळे आमदारांनी परस्पर उरकलेली नगरसेवक निधीतील कामांची उद्घाटने, भूमिपूजने पुन्हा नगरसेवकांच्या हस्ते आयोजित करण्याचे निर्देश सभापती निमसे यांनी दिले.
प्रशासनाची झाली कोंडी
महापालिकेत भाजपची सत्ता असून, उदघाटन केलेले आमदार हे भाजपचेच होते. त्यामुळे या आमदारांनी निवडणुकीपूर्वी कामे दाखवण्यासाठी महापालिकेतील कामे आपल्या नावावर दाखवली. परंतु, आता स्थायी समितीने पुन्हा या कामाचे उदघाटन, भूमिपुजन करण्याचे निर्देश दिल्याने आता प्रशासनाचीच कोंडी झाली आहे. नेमके कोणाचे ऐकावे, अशी कोंडी प्रशासनाची झाली आहे.