यंदा हनुमान जयंती घरातच साजरी
..
म. टा. प्रतिनिधी, नाशिक
'सत्राणे उड्डाणे हुंकार वदनी... करी डळमळ भूमंडळ सिंधूजळ गगनी...' समर्थ रामदास स्वामी रचित या स्फूर्तिदायक शब्दांमध्ये करोनाच्या संकटप्रसंगी श्री मारुतीरायाची आळवणी हनुमान जयंतीच्या निमित्ताने घरोघरी करण्यात आली. दरवर्षी शहरातील सांस्कृतिक व सामाजिक सार्वजनिक मंडळांच्या वतीने साजरी होणारी हनुमान जयंती यंदा करोनाच्या वातावरणामुळे भक्तांनी घरातच साधेपणाने साजरी करीत विश्वाच्या संकटमुक्तीसाठी हनुमंतास साकडे घातले.
करोनाच्या प्रादुर्भावामुळे शहरात कुठेही श्री हनुमान जयंतीचा सार्वजनिक उत्सव साजरा झाला नाही. शहर व परिसरातील सर्व मारुती मंदिरात मोजक्या भाविकांनी पारंपरिक पध्दतीने हनुमंताचे पूजन करीत जन्मोत्सव साजरा केला. याशिवाय सर्व हनुमान भक्तांनी घरोघरी साधेपणाने हनुमंताचा जन्मोत्सव साजरा करतानाच करोनाच्या संकटातून जगाला बाहेर काढण्याचे साकडे घातले.
दरवर्षी शहर व जिल्ह्यात उत्साहाने साजऱ्या होणाऱ्या हनुमान जन्मोत्सवाच्या आनंदमयी सोहळ्यांवर यंदा करोनाच्या प्रादुर्भावाने विरजण पडले. शहरातील श्री अंजनेरी देवस्थान, श्री टाकळी देवस्थान, गोदाकाठचा दुतोंड्या मारुती या परिसरात होणारे आदी कार्यक्रम आयोजकांना करोनाच्या पार्श्वभूमीवर रद्द करावे लागले. प्रशासनाच्या वतीनेही हा उत्सव साधेपणाने घरातच साजरा करण्याचे आवाहन भाविकांना करण्यात आले होते. यामुळे भाविकांनीही परंपरागत पद्धतीने घरात हनुमान जन्मोत्सवाचा सोहळा साजरा केला. लॉकडाऊनच्या परिस्थितीत हनुमंतास नैवेद्य दाखविण्यासाठी उपयोगात आणले जाणारे फुटाणेदेखील यंदा बहुतांश भाविकांना मिळू शकले नाहीत. यामुळे फुटाण्यांऐवजी अनेकांनी गूळ-शेंगादाण्याचा नैवेद्य हनुमंतास दाखवत भावूक मनाने जयंती साजरी केली.
फेसबुक, व्हॉट्सअप, टि्वटर यासारख्या सामाजिक माध्यमांवरदेखील हनुमान जयंतीचा उत्साह दिसून आला. घरोघरी व विविध मंदिरात छोटेखानी पद्धतीने साजऱ्या झालेल्या जयंतीचा सोहळा काही भाविकांनी व्हीडीओ, फोटो या माध्यमांद्वार सर्वांसाठी उपलब्ध करून दिला.