म. टा. वृत्तसेवा, गंगापूररोड
शिवाजीनगर भागातील इंदिरा गांधी विद्यालयात तिसरीच्या विद्यार्थ्यांला जबर मारहाण केल्याची घटना उघडकीस आल्यानंतर संबंधित संशयित शिक्षिकेवर गंगापूर पोलिस स्टेशनमध्ये गुन्हा दाखल करण्यात आला आहे.
पोलिसांनी दिलेल्या माहितीनुसार इंदिरा गांधी विद्यालयात इयत्ता तिसरीत शिकणाऱ्या विद्यार्थ्याने वर्गात शिकविणाऱ्या पाटोळ नावाच्या शिक्षिकेने मंगळवारी (दि. १७) दुपारी ३ वाजून १९ मिनिटांनी पट्टीने जबर मारहाण केल्याचे सांगितले. यानंतर विद्यार्थ्यच्या आईने गंगापूर पोलिसात दिलेल्या फिर्यादीवरून पोलिसांनी संबधित पाटोळे या शिक्षिकेवर गुन्हा दाखल केला. दरम्यान, विद्यार्थ्याला मारहाणीची घटना शाळेतील सीसीटीव्ही कॅमेऱ्यामध्ये कैद झाली आहे. त्याआधारावरून पोलिस तपास करीत आहेत.
विद्यार्थ्यांला जबर मारहाण करण्यात आल्यानंतर त्याच्या तसेच इतर विद्यार्थ्यांच्या पालकांनीही शाळा प्रशासनाला जाब विचारला. परंतु, मारहाण करणारी शिक्षिका दमबाजी करत असल्याने त्यांच्याविरोधात शाळेत कुणीत बोलत नसल्याचे शालेय सूत्रांनी सांगितले. तसेच पाटोळे यांच्याबाबत पालक व शिक्षकांनीही तक्रारी दिल्या आहेत. मात्र त्यावर कारवाई झाली नसल्याने पालकांसह शिक्षकांनीही आश्चर्य व्यक्त केले आहे.