येवला बसस्थानकात मासिक पाससह स्मार्ट कार्डसाठी गर्दी
संजय लोणारी, येवला
यंदाचे शालेय शैक्षणिक वर्ष सुरू झाल्याने सवलतीचा पास मिळवण्यासाठी शालेय व महाविद्यालयीन विद्यार्थ्यांची येवला बस स्थानकात मोठी झुंबड उडाली असतांनाच, 'एसटी' महामंडळाने ज्येष्ठ नागरिकांसाठी हाती घेतलेल्या 'स्मार्ट कार्ड' योजनेत ऑनलाइन नोंदणीसाठी बसस्थानकात ज्येष्ठ नागरिकांची देखील दिवसागणिक मोठी गर्दी होऊ लागली आहे. येवला स्थानकात विद्यार्थी पासेस व ज्येष्ठांच्या स्मार्ट कार्ड नोंदणीसाठी एकच कक्ष असल्याने या कक्षा बाहेरील खिडकीसमोर विद्यार्थी रांगेत अन् वयोवृद्ध ज्येष्ठ नागरिक जमिनीवर ठाण मांडून प्रतिक्षेत असल्याचे चित्र आहे. त्यामुळेच एसटी प्रशासनाने विद्यार्थी व ज्येष्ठांसाठी स्वतंत्र दोन कक्ष सुरू करण्याची मागणी होत आहे.
एसटीचा सवलतीचा पास ग्रामीण भागातील विद्यार्थ्यांसाठी मोठा आधार आहे. येवला शहर व परिसरात शाळा, कॉलेसमध्ये ग्रामीण भागातील हजारो विद्यार्थी दररोज बसने प्रवास करतात. या प्रवास करणाऱ्या विद्यार्थ्यांपैकी जवळपास पाच हजार विद्यार्थी पासधारक आहेत. शैक्षणिक वर्षाला सुरुवात झाल्यामुळे नवीन पास काढण्यासाठी विद्यार्थ्यांची येवला बसस्थानकात गर्दी वाढली आहे. सध्या दररोज दीडशे ते दोनशे विद्यार्थी पास कक्षासमोर सकाळी ८ ते दुपारी १२ पर्यंत ठाण मांडून बसतात.
पास मिळणाऱ्या कक्षातच ज्येष्ठ नागरिकांसाठी एसटीने हाती घेतलेल्या 'स्मार्ट कार्ड' बायोमेट्रिक पद्धतीने ऑनलाइन रजिस्टेशन करण्याचे काम सुरू आहे. येवला आगाराने या कक्षात आगारातील दोन कर्मचाऱ्यांची नियुक्ती केली आहे. असे असले तरी, एकच कक्ष अन् बाहेरील दिवसाकाठी मोठ्या संख्येने शाळा-महाविद्यालयीन विद्यार्थ्यांसह स्मार्ट कार्ड नोंदणीसाठी ज्येष्ठांची होणारी मोठी गर्दी बघता, 'विद्यार्थी रांगेत अन् ज्येष्ठ प्रतिक्षेत' असेच एकंदरीत चित्र सध्या येवला बस स्थानकात दिसत आहे. ज्येष्ठांमधील पुरुषांबरोबरच महिला देखील बराच वेळ ताटकळत बसतात. विशेष म्हणजे या कक्षासमोर विद्यार्थ्यांचीच गर्दी अधिक होत असल्याने सळसळत्या रक्ताच्या तरुणाईत स्मार्ट कार्ड नोंदणीसाठी आपण कसं घुसावं, या विचारातून ज्येष्ठ नागरिक जमिनीवरच ठिय्या देत आहेत.
एसटीने ज्येष्ठ नागरिकांसाठी हाती घेतलेली स्मार्ट कार्ड योजना अतिशय स्तुत्य आहे. मात्र, विद्यार्थ्यांसाठीचा पास व ज्येष्ठ नागरिकांसाठी स्मार्ट कार्ड नोंदणी या दोन्हीसाठी एकच कक्ष असल्याने मोठा त्रास सहन करावा लागत आहे. शनिवारी अनेक तास बाहेर बसूनही नंबरच लागला नाही. आज पुन्हा नोंदणीसाठी आलो आहे.
- तुकाराम खांडेकर, जेष्ठ नागरिक