म. टा. खास प्रतिनिधी, नाशिक
विधानसभा निवडणुकीच्या प्रचाराच्या तोफा आज, शनिवारी (दि. १९) सायंकाळी थंडावणार आहेत. प्रचाराचा आज शेवटचा दिवस असून, सायंकाळी सहा वाजता प्रचार थांबणार आहे. मात्र, जाहीर प्रचार संपणार असला, तरी रविवारच्या सुटीमुळे उमेदवारांचा छुपा प्रचारावर जोर राहणार आहे.
जिल्ह्यात एकूण १५ विधानसभा मतदारसंघ असून, त्यात १४८ उमेदवार रिंगणात आहेत. त्यातील राष्ट्रीय व राज्यस्तरीय पक्षांचे ५३, मान्यताप्राप्त नोंदणीकृत पक्षांचे २३, तर ७२ अपक्ष उमेदवार रिंगणात आहेत. बहुतांश उमेदवारांकडून शुक्रवारी प्रचार फेरीवर भर देण्यात आला. शनिवारी हेच चित्र सर्वत्र दिसणार आहे. निवडणुकीत १४८ उमेदवार रिंगणात असले, तरी काही उमेदवारच सर्व विभागात जाऊ शकले. इतर उमेदवारांनी सोशल मीडियावरच भर दिला. या निवडणुकीत अनेक पक्षांच्या स्टार प्रचारकरांनी जिल्ह्यासह शहराकडे पाठ फिरविल्यामुळे उमेदवारांचा हिरमोड झाला. भाजप, शिवसेना, राष्ट्रवादी, मनसे, वंचित बहुजन आघाडीने काही ठिकाणी सभा घेऊन रंगत आणली, तरी ती नेहमीसारखी नव्हती.
--
रिक्षातून प्रचार बंद
रिक्षाला भोंगा लावून सुरू असलेला प्रचारदेखील आता बंद होणार आहे. त्यामुळे सर्वांना दिलासा मिळणार आहे. गेले काही दिवस गल्लीबोळांतून आणि मोठ्या रस्त्यांवरही विविध राजकीय पक्ष अन् उमेदवारांच्या प्रचारासाठी या रिक्षा मोठ्या प्रमाणात फिरत होत्या. त्यामुळे निवडणुकीची रंगत वाढत असली, तरी काही ठिकाणी त्याचा अतिरेक होत असल्याने नागरिक त्रस्त झाले होते.