गोदेतील स्रोत होणार पुनर्जीवित

म. टा. वृत्तसेवा, पंचवटी

स्मार्ट सिटी योजनेंतर्गत गोदाकाठाचा विकास करण्यासाठी अॅक्शन प्लॅन करण्यात येणार आहे. त्याच्या पाहणीसाठी रिव्हर डेव्हलपमेंट एजन्सीच्या शिष्टमंडळाने गोदाकाठाची पाहणी केली. नदीपात्रातील काँक्रिटीकरण काढून जिवंत पाण्याचे स्रोत कसे पुनर्जीवित करता येतील, याचा अॅक्शन प्लॅन तयार करण्यात येईल.

अहिल्यादेवी होळकर पुलापासून शनिवार (दि. १८) या पाहणीस सुरुवात करण्यात आली. रोकडोबा मंदिरापर्यंत हा दौरा झाला. शहराची खास ओळख असणारी गोदावरी नदी मूळ स्वरुपात बारा महिने कशा पद्धतीने वाहती राहील यासाठी प्रयत्न करण्यात येणार आहेत. नदीत जाणारे सांडपाणी, कचरा टाकणे बंद करण्याचा प्रयत्न करून नदीचे अरुंद पात्र कसे रुंद करता येईल, यासाठीदेखील या उपक्रमांतर्गत प्रयत्न करण्यात येणार आहेत.

पाहणी दौऱ्यात नाशिक म्युनिसिपल स्मार्ट सिटी डेव्हलपमेंट कॉर्पोरेशन लिमिटेड आणि रिव्हर डेव्हलपमेंट फ्रंटचे वरिष्ठ प्रकल्प अभियंता संजय पाटील, सहाय्यक नियोजक सुधीर सुतार, अर्बन डिझायनर अली कादरी, देवांग जानी, अमोल सूर्यवंशी, अतुल शेवाळे आदी सहभागी झाले होते. होळकर पटांगणात अहिल्यादेवींचे कोर्ट होते, तिथे बसून त्या न्याय-निवाडा करायच्या, यासंबंधीची माहितीही पाहणीवेळी देण्यात आली.

या ठिकाणी झाला सर्व्हे

दौऱ्यात गोदावरी पात्रातील काँक्रिटीकरणाखाली दबली गेलेली १७ प्राचीन कुंडे काँक्रीट काढून पुनर्जीवित करण्याचा सर्व्हे झाला. अरुणा-गोदावरी संगम पूर्ववत करण्यासाठी अरुणा नदीच्या प्रवाहावर बांधल्या गेलेल्या उताराचे सर्वेक्षण करण्यात आले. अहिल्यादेवी होळकर पुलाखालील गोपिकाबाई पेशवे यांच्या जीर्ण झालेल्या बंगल्याचीही पाहणी करण्यात आली. पेशवे कुंडामध्ये संगम होणाऱ्या वरुणा, सरस्वती, गायत्री, सावित्री आणि श्रद्धा या नद्यांचाही सर्व्हे झाला. दुतोंड्या मारुतीच्या पुढे कुंडात बांधलेल्या रस्त्यामुळे पुराची तीव्रता वाढली आहे. ती कमी करण्यासंबंधीही सर्व्हे करण्यात आला. जिवंत पाण्याचे स्रोत पुनर्जीवित करण्यासाठी स्पॉट लोकेट करण्यात आले.