पूजा की जादूटोणा? वाद पोलिस ठाण्यापर्यंत

म. टा. वृत्तसेवा, पंचवटी

पाथरवट लेन येथील एकाने घराच्या बांधकामासाठी पूजा मांडली, तर दुसऱ्या भावाने ही पूजा नसून, जादूटोणा करीत असल्याचे संशय घेतला. त्यांच्यात झालेला वाद पंचवटी पोलिस ठाण्यापर्यंत पोहोचला. पोलिसांनी घटनास्थळी येऊन पाहणी केली. दोघांचेही म्हणणे ऐकून घेतले. या संदर्भात मात्र पोलिस ठाण्यात कुणी तक्रार दाखल केली नाही.

पंचवटीतील पाथरवट लेन येथील विजय लाटे यांनी घराच्या बांधकामासाठी शेड तयार केले. त्या शेडमध्ये घराच्या बांधकामासाठी लागणाऱ्या टाकीचे बांधकाम करण्यासाठी पाया खोदला. त्या खोदलेल्या पायाची पूजा वास्तुशास्त्रानुसार करण्यात आली.

मात्र ही पूजा नसून, हा जादूटोणा असल्याचा संशय त्यांचे चुलत बंधू दत्तात्रय लाटे यांनी घेतला. हा वाद पंचवटी पोलिस ठाण्यापर्यंत पोहोचला. पोलिसांनी दोघांचेही म्हणणे ऐकून घेतल्यानंतर कुणाला तक्रार द्यायची, तशी तक्रार द्यावी असे सांगितल्यावर मात्र कुणी तक्रार द्यायला पुढे येईना. या बांधकामाच्या पूजेमुळे वाद पोलिस ठाण्यापर्यंत पोहोचल्याने शेडमध्ये नेमके काय केले हे बघण्यासाठी नागरिकांची गर्दी झाली होती.