स्वामीनारायण मंदिराचा मंत्रोच्चाराने शिलान्यास

म. टा. वृत्तसेवा, पंचवटी

केवडीबन येथे बी. ए. पी. एस. स्वामीनारायण मंदिराचा शिलान्यास विधी संस्थेचे सहावे आध्यात्मिक गुरू प्रकट ब्रह्मस्वरुप महंतस्वामी महाराज यांच्या प्रमुख उपस्थितीत वैदिक मंत्रोच्चाराने करण्यात आला. केवडीबन येथे झालेल्या शिलान्यास विधी कार्यक्रमास शनिवारी (दि. ११) सार्वजनिक बांधकाम मंत्री व ठाण्याचे पालकमंत्री एकनाथ शिंदे, पर्यटनमंत्री रावल, विधानसभेचे माजी अध्यक्ष अरुण गुजराथी आदी उपस्थित होते.

या कार्यक्रमात ब्रह्मस्वरुप स्वामी महाराज म्हणाले, आज प्रत्येक जण सुख मिळविण्यासाठी धडपड करीत आहे. शाश्वत सुखाचा आनंद मिळविण्यासाठी भगवंताची आराधना नियमात राहून करावी लागते. नाशिकमध्ये केवळ मंदिर निर्मितीचे कार्य नव्हे तर शाळा, छात्रालय, सुसज्ज दवाखाना अशा समाज उपयोगी उपक्रम सुरू करण्यात येणार आहे, असे मंत्री एकनाथ शिंदे म्हणाले. या मंदिराद्वारे संस्कार व संस्कृती जतन करण्याचे काम होणार आहे, असेही त्यांनी सांगितले.


उपक्रमांचा आलेख

ब्रह्मस्वरुप शास्त्री महाराज यांनी १९०७ मध्ये बी. ए. पी. एस. स्वामीनारायण संस्था स्थापन केली होती. सन १७८१ के १८३० या कालावधीत भगवान स्वामीनारायण यांच्या द्वारा प्रबोधित वैदिक आदर्शांना केंद्रस्थानी ठेऊन या संप्रदायाच्या कार्याला प्रवाहित केले आहे. आज या संप्रदायाचे कार्य ९ हजार ९० सत्संग केंद्रांद्वारे संपूर्ण जगात चालू आहे. यात संस्कारधाम, मंदिर निर्मिती, बाल संस्कार, युवा युवती संस्कार, महिला कल्याण केंद्र, सत्संग केंद्र अशी अनेक कार्यांचा समावेश आहे. त्याच बरोबर भुकंपग्रस्त गावांचे पुनर्निर्माण कार्य, दुष्काळग्रस्त गावांमध्ये जलसंचय कार्य, लहान लहान गावात प्राथमिक शाळांची स्थापन तसेच सुसज्ज छात्रालय या आवश्यक बाबींच्या पूर्तीसाठी बी. ए. पी. एस. स्वामीनारायण संस्था अग्रेसर असल्याची माहिती आयोजकांनी दिली.