टॅली, डीटीपी, नर्सिंगचे मोफत कोर्स
कौशल्य विकास योजनेंतर्गत उपक्रम
म. टा. प्रतिनिधी, नाशिक
टॅली, डीपीटी, नर्सिंग आणि ब्युटीपार्लरचे मोफत प्रशिक्षण शहरातील मेरी आणि पंचवटी परिसरात देण्यात येत आहे. कौशल्य विकास योजनेंतर्गत हा उपक्रम अॅड्स इन्फोटेक्ट, जिज्ञासा बहुउद्देशीय शिक्षण संस्था आणि ब्लॉसम ब्युटीपार्लर यांच्या संयुक्त विद्यमाने आयोजित करण्यात आला आहे. या प्रशिक्षणाचा लाभ सर्व विद्यार्थ्यांना घेता येणार असून ३० विद्यार्थ्यांची एक बॅच, असे हे प्रशिक्षण सुरू असणार आहे.
कौशल्य विकास योजनेंतर्गत अनुसूचित जाती जमातीच्या विद्यार्थ्यांना टॅली व डीटीपीचे मोफत प्रशिक्षण देण्यात येणार आहे. हे प्रशिक्षण मेरी-रासबिहारी लिंकरोडवरील साईनगर परिसरातील धनिष्ठा अपार्टमेंटमधील अॅड्स इन्फोटेक्टमध्ये देण्यात येईल. तसेच सर्व विद्यार्थिनींसाठी ब्युटी पार्लर आणि नर्सिंगचा कोर्स मोफत असून पंचवटी परिसरातील नाग चौकातील रेणू अपार्टमेंटमध्ये हे कोर्स होतील. विद्यार्थ्यांच्या कौशल्य विकासासाठी तसेच रोजगाराच्या संधी उपलब्ध व्हाव्यात, या हेतूने या प्रशिक्षणाचे आयोजन करण्यात आले आहे. सर्व प्रशिक्षणासाठी ३० विद्यार्थ्यांची एक बॅच असणार असून त्यासाठी नावनोंदणी सुरू झाली आहे. प्रशिक्षणानंतर कौशल्य विकास योजनेंतर्गत विद्यार्थ्यांना प्रमाणपत्र वाटप केले जाणार असून रोजगार मेळाव्यातून रोजगाराच्या संधी उपलब्ध करून देण्यासाठी प्रयत्न केले जाणार असल्याचे आयोजकांनी सांगितले. या प्रशिक्षणासाठी प्रवेश घेऊ इच्छिणाऱ्या विद्यार्थ्यांना आधार कार्ड, गुणपत्रक, शाळा सोडल्याचा दाखला, जातीचा दाखला या कागदपत्रांची पूर्तता करावी लागेल. इच्छुकांनी टॅली व डीटीपीसाठी देवा वाटाणे ७३८७१४८४४४, तर ब्यूटी पार्लर व नर्सिंगसाठी चंद्रकांत चिंचोले ९४०४७८९६८६ या क्रमांकावर संपर्क साधावा, असे आवाहन करण्यात आले आहे.