म. टा. वृत्तसेवा, नाशिकरोड
मोटार वाहन कायद्यातील नवीन तरतुदीनुसार मद्यपान करून वाहन चालविल्याचा गुन्हा दाखल असलेल्या चौघा आरोपींना नाशिकरोड येथील मोटार वाहन न्यायालयाने प्रत्येकी १० हजार रुपये दंड ठोठावला. केंद्र सरकारने मोटार वाहन कायद्यात नवीन बदल केल्यानंतर या कायद्यानुसार आरोपींवर न्यायालयात दोष सिद्ध होऊन त्यांना दंडाची शिक्षा होणारा हा शहरातील पहिलाच खटला ठरला आहे.
केंद्र सरकारने मोटार वाहन कायद्यातील तरतुदीत नव्याने काही बदल केले आहेत. यातील बहुतेक तरतुदींमुळे मोटार वाहन कायद्यांचे नियम मोडणाऱ्या विरोधातील खटल्यांतील दोषी आरोपींना जबर दंड निश्चित करण्यात आलेला आहे. नाशिकरोड पोलिस ठाण्यात दाखल गुन्ह्यातील चार आरोपींवरील मद्यपान करून वाहन चालविण्याचा आरोप सिद्ध झाल्याने या चारही आरोपींना मोटार वाहन न्यायालयाने प्रत्येकी १० हजार रुपये दंड ठोठावला. मद्यपान करून वाहन चालविल्या प्रकरणी दाखल गुन्ह्यात न्यायालयाने दंडाची शिक्षा ठोठावलेल्यांमध्ये गोरख भगीरथ शिंदे (वय ४१ रा. गायकवाड मळा, जेलरोड), अंगतराज चौधरी (वय २८, रा. गंधर्वनगरी), अजय सोमावीर डिंगाया (वय २६, रा. समर्थ सोसायटी, सिन्नर फाटा) आणि दिगंबर मारुती तुंगार (वय २८, रा. शिंदे, ता. नाशिक) या चौघांचा समावेश आहे. नाशिकरोड पोलिस ठाण्याचे वरिष्ठ निरीक्षक सूरज बिजली यांच्या मार्गदर्शनाखाली बीट मार्शल गणेश गोसावी आणि कैलास थोरात यांनी या खटल्याचा तपास केला होता.