कुटुंबाने शोधाशोध केली, मात्र पत्ता लागेना; मोबाईल लोकेशनची मदत घेताच खळबळजनक माहिती उघड

नाशिक : शहराजवळ असलेल्या अंजनेरी-मुळेगाव रस्त्यालगतच्या डोंगराळ भागात बेपत्ता असलेल्या व्यक्तीचा मृतदेह आढळून आल्याने खळबळ उडाली आहे. भाऊसाहेब ठकाजी गुंजाळ (वय ४७, विहितगाव, नाशिक) असं मृत व्यक्तीचं नाव असून शनिवारी दुपारच्या सुमारास त्यांचा मृतदेह आढळला आहे.

याबाबत मिळालेली अधिक माहिती अशी की, भाऊसाहेब गुंजाळ यांच्या कुटुंबीयांनी नाशिकच्या अंबड पोलीस ठाण्यात ते २ मार्चपासून बेपत्ता असल्याची तक्रार दाखल केली होती. तसेच समाजमाध्यमांवर देखील ते बेपत्ता असल्याचा फोटो व्हायरल होत होता. अखेर त्यांचा काल शनिवारी मृतदेह आढळून आला आहे. अंजनेरी-मुळेगाव रस्त्यावरील प्रतीकेदारनाथ मंदिरापुढे घाट रस्त्याच्या बाजूला एका हॉटेलजवळ दुचाकी उभी करून भाऊसाहेब डोंगराच्या दिशेने गेले होते. तसेच त्यांच्या मोबाईलचे शेवटचे लोकेशन हॉटेलसमोरच्या शेतात डोंगरालगत आढळले होते. यावेळी त्यांच्या कुटुंबीयांनी शोध घेण्यास सुरुवात केली.

पोलिसांशी संपर्क साधल्यानंतर पोलिसांनी शेवटच्या मोबाईल लोकेशनच्या आधारे आणि स्थानिक ग्रामस्थांच्या मदतीने डोंगरावर शोध घेतला. त्यावेळी भाऊसाहेब यांचा मृतदेह डोंगराच्या कपारीत आढळून आला.

शिवराज पाटील चाकूरकर यांच्या चुलत भावाचं टोकाचं पाऊल, लातूरमध्ये खळबळ, पोलीस घटनास्थळी

मृतदेह आढळून आल्यानंतर भाऊसाहेब गुंजाळ यांच्या शरीरावर खरचटल्याच्या खुणाही दिसून आल्या. त्यामुळे घसरल्याने खडकावर आपटून त्यांचा मृत्यू झाला असावा, असा प्राथमिक अंदाज व्यक्त होत आहे. तसंच भाऊसाहेब यांना ट्रेकिंगची आवड असल्याचंही त्यांच्या कुटुंबियांकडून सांगण्यात आलं आहे. भाऊसाहेब गुंजाळ यांचा मृतदेह घटनास्थळावरून खाली आणण्यात आला असून याबाबत वाडीवरील पोलीस ठाण्यात आकस्मित मृत्यूची नोंद करण्यात आली असून पुढील तपास पोलीस करत आहे.