दिंडोरी-पेठ रस्त्यावरील घटना; दहा प्रवाशी जखमी
म. टा. वृत्तसेवा, दिंडोरी
देवळा-मालेगाव रस्त्यावरील बस आणि रिक्षाचा अपघाताची घटना ताजी असतानाच सोमवारी पेठ-आगाराच्या पेठ-दिंडोरी बसला सोमवारी सकाळी आंबेगण ते चाचडगाव दरम्यान अपघात झाला. बसचा स्टेअरिंग रॉड तुटल्याने हा अपघात झाला. सुदैवाने या अपघातात कोणतीही जीवितहानी झाली नाही. बसमधील दहा प्रवासी किरकोळ जखमी झाले. मात्र बस उलटली, असे कळताच अनेकांच्या मनात धस्स् झाले होते.
पेठ आगाराची बस (एमएच ०७ सी ९५१५) सकाळी पेठहून दिंडोरीकडे येत असताना आंबेगणजवळ बसच्या स्टेअरिंगचा रॉड तुटला. त्यामुळे चालकाचे नियंत्रण सुटले आणि बस रस्त्याच्या कडेला उलटली. अचानक झालेल्या या प्रकाराममुळे बसमधील प्रवाशांनी एकच आरडाओरडा केला. परिसरातील व रस्त्यावरून जाणाऱ्या वाहनधारकांनी तत्काळ घटनास्थळी धाव घेत जखमी प्रवाशांना बाहेर काढून उमराळे येथील प्राथमिक आरोग्य केंद्रात दाखल केले.
जखमींची नावे अशी
गोविंद बोरसे (वय ५३, पेठ), चंद्रशेखर पठाडे (वय ४५, पेठ), हिरामण कोतवाल (वय ५२, आंबेगण), सुरज गायकवाड (वय २१, आंबेगण), देवीदास कोतवाल (वय ३९, आंबेगण), कामील खुरशेद (वय २३, पेठ), भुरा नवाब (वय १८, पेठ)
चंद्रकांत कोतवाल (वय १९, आंबेगण), कृष्णा इंपाळ (वय ३७, तोंडवळ), रामनाथ गायकवाड (वय ७०, गोळशी)
नादुरुस्त बसेसचा प्रश्न ऐरणीवर
पेठ आगाराच्या बसेस कायम नादुरूस्त स्थितीत रस्त्यावरून धावत असतात. अनेक वेळा या बसेस रस्त्यावर पडून राहिल्याचे प्रवाशांनी सांगितले. पेठ आगाराच्या अनेक बसेस डोंगरदऱ्यातून घाटातून प्रवास करीत असल्याने जुनाट व नादुरुस्त बसेसमुळे भविष्यात मोठा दुर्घटना होवू शकते.