'त्या' शेतकरी महिलेचे प्रकरण न्यायप्रविष्ठ

मुंबईत मंत्रालयाजवळ आत्महत्येचा प्रयत्न करणाऱ्या चांदवड तालुक्यातील शेतकरी शकुंतला कारभारी झाल्टे यांची मागणी मालकी हक्क जमीन ताब्याबाबत आहे. या प्रकरणी जिल्हा सत्र न्यायाधीश, निफाड यांच्याकडे अपिल न्यायप्रविष्ठ आहे. कोर्टाकडून अंतिम निकाल पारीत झाल्यानंतर झाल्टे यांच्या मागणीनुसार कार्यवाही करण्यात येईल, अशी माहिती चांदवडचे उपविभागीय अधिकारी सिद्धार्थ भंडारे यांनी दिली.

शकुंतला झाल्टे यांनी शुक्रवारी मंत्रालयाजवळ विषप्राशन करून आत्महत्येचा प्रयत्न केला. धुळे जिल्ह्यातील धर्माजी पाटील या शेतकऱ्याने मंत्रालयात विषप्राशन करून आत्महत्या केल्यानंतर व्यथित शेतकरी मंत्रालयात धाव घेऊ लागले आहेत. चांदवड तालुक्यातील वडगाव पंगू येथील शेतकरी महिला शकुंतला झाल्टे यांचा मालकी हक्काच्या जमिनीबाबत वाद सुरू आहे. या जमिनीचा ताबा मिळावा, अशी मागणी त्यांनी जिल्हा प्रशासनाकडे केली आहे. झाल्टे यांनी ३० डिसेंबर २०१७ रोजी चांदवड प्रांताधिकाऱ्यांना उपोषणाबाबतचे निवेदन दिले होते. त्यांच्या कागदपत्रांची पडताळणी केली असता त्यांची मागणी दिवाणी स्वरूपाची असल्याचे स्पष्ट झाले. त्यामुळे त्यांनी उपोषण अथवा अन्य आंदोलन करू नये अशी विनंती करीत त्यांचे समुपदेशनही करण्यात आले. जिल्हा सत्र न्यायालय, निफाड यांच्याकडे त्यांनी दाद मागावी, असा सल्ला त्यांना देण्यात आला.

शकुंतला झाल्टे यांचे जमिनीचे प्रकरण न्यायप्रविष्ठ आहे. त्यामुळे या प्रकरणावर भाष्य करणे उचित नाही. जमिनीच्या संदर्भातील दावा दिवाणी न्यायालयात प्रलंबित असल्याने व्यथित होऊन त्यांनी हे पाऊल उचलले असावे. न्यायालयाच्या आदेशाची प्रतीक्षा करणे न्यायोचित होईल.
- सिद्धार्थ भंडारे, प्रांताधिकारी चांदवड