आठवडाभरात ९ अंश सेल्सिअसने तापमानात वाढ
...
म. टा. प्रतिनिधी, नाशिक
अवघ्या तीन-चार दिवसांपूर्वीच दिवसभर थंडीचा कडाका जाणवत असला तरी आता पुन्हा थंडी गायब झाली आहे. आठवडाभरात किमान तापमान ९ अंश सेल्सिअसने वाढले असल्याने थंडीचा कडाका गायब झाला आहे.
नाशिकची थंडी दरवर्षी हुडहुडी भरवणारी असते. यंदा मात्र चित्र वेगळे असून, हुडहुडी भरवणारे फार कमी दिवस नाशिककरांना यंदा जाणवले. तीन ते चार वेळा नाशिकचे किमान तापमान यंदा राज्यात सर्वात कमी म्हणून नोंदवले गेले. या काळात नाशिकमध्ये ठिकठिकाणी पेटलेल्या शेकोट्या, उबदार कपडे खरेदीसाठी झालेली गर्दी असे चित्र दिसून येत होते. पुन्हा किमान तापमानात वाढ झाली असून, थंडी गायब झाली आहे. यंदा नाशिकमध्ये पाऊस मोठ्या प्रमाणात पडल्याने हिवाळाही कडाक्याचा असेल, असा अंदाज वर्तवण्यात येत होता. मात्र, त्याउलट चित्र किमान तापमानात सातत्याने होणाऱ्या वाढीमुळे दिसून येत आहे. उत्तरेकडून येणाऱ्या थंड वाऱ्यांचे प्रवाह खंडित झाल्याने किमान तापमानात वाढ झाली असल्याचे सांगण्यात येत आहे.
..
\Bदिनांक किमान तापमान (\Bअंश सेल्सिअसमध्ये\B)\B
२३ जानेवारी : १५
२२ जानेवारी : १५
२१ जानेवारी : १३.५
२० जानेवारी : १२.७
१९ जानेवारी : ११
१८ जानेवारी : ७.८
१७ जानेवारी : ६