गणेशोत्सवावर सोशल मीडियाचा प्रभाव

व्हायरल क्लिप्सप्रमाणे मूर्तिकारांकडे मंडळांची मागणी

म. टा. वृत्तसेवा, पंचवटी

गणेशोत्सवात सार्वजनिक गणेशोत्सव मंडळाचा विविध प्रकारच्या आकर्षक आरास करण्यावर भर असतो. गणेशोत्सवाला धार्मिक उत्सवाचे स्वरूप असल्याने पौराणिक विषयांवरील आरास करण्यासाठी मूर्तिकारांकडे मंडळांच्या कार्यकर्त्यांची मागणी होत आहे.

यंदाही बहुतांश सार्वजनिक गणेशोत्सव मंडळाचे कार्यकर्ते मूर्तिकारांना सोशल मीडियातून व्हायरल होणाऱ्या क्लिप दाखवून त्याप्रमाणेच चलतचित्रांची आरास करण्याची मागणी करीत आहेत.

सोशल मीडियाचा वाढता प्रभाव लक्षात घेता, विविध प्रकारचे सामाजिक, सांस्कृतिक, राजकीय, शैक्षणिक अशा प्रकारचे मेसेजेस एका झटक्यात पोहचण्याचे काम होत आहे. त्याचा परिणामही तितक्याच वेगाने होऊ लागल्याने त्यातील काही मेसेज परिणामकारक ठरत आहेत. यात जास्त करून धार्मिक विषयांच्या क्लिप या यंदाच्या गणेशोत्सवात प्रत्यक्षात चिलतचित्राद्वारे उतरणार आहेत, असे सार्वजनिक गणेशोत्सव मंडळांच्या मागणीवरून दिसते.