विदेशी दारूसह वाईनच्या खपात मात्र वाढ
म. टा. खास प्रतिनिधी, नाशिक
विधानसभा निवडणूक काळात ऑक्टोबर महिन्यात जिल्ह्यात देशी व बीअरच्या विक्रीत घट झाली आहे. तर विदेशी दारू व वाईनच्या विक्रीत किंचित वाढ झाली आहे. निवडणूक काळात सर्वत्र ओल्या पार्ट्या सुरू असतांना ही विक्री कशी घटली असा प्रश्न आता उपस्थितीत केला जात आहे. तर दुसरीकडे, अवैध दारूचा वापर मोठ्या प्रमाणात झाल्याची चर्चा आहे.
राज्य उत्पादन शुल्क कार्यालयातर्फे मद्यविक्रीचे आकडे दर महिन्यांला एकत्र केले जातात. त्याची माहिती पुढे आली आहे. ऑक्टोबर महिन्यात देशी दारूची विक्री १६ लाख ७६ हजार ४१५ लिटर झाली. गेल्या वर्षी याच महिन्यात ही विक्री १७ लाख १६ हजार ६६४ लिटर होती. यात २.३४ टक्के घट झाली आहे. तर बीअर विक्रीत १३.२७ टक्के घट झाली आहे. गेल्या वर्षी ऑक्टोबर महिन्यात ७ लाख ९७ हजार १९० लिटर बीअर विकली गेली. या वर्षी याच महिन्यात ६ लाख ९१ हजार ३८१ लिटर बीअर विकली गेली.
विदेशी दारू व वाईन विक्रीत मात्र किंचित वाढ झाली आहे. गेल्या वर्षी विदेशी दारू ७ लाख ५१ हजार १० लिटर विकली गेली होती. यावर्षी ७ लाख ७८ हजार ६३९ लिटर विकली गेली आहे. त्यात ३.६८ टक्के वाढ झाली आहे. वाईनची विक्री गेल्या वर्षी ४१ हजार ६०८ लिटर होती. यावर्षी ती ४१ हजार ९१४ लिटर झाली. यात ०.७४ टक्के फक्त वाढ झाली आहे.
सप्टेंबरमध्ये घटच
सप्टेंबर महिन्यात देशी दारू विक्रीमध्ये ०.२८ टक्के घट होती. तर बीअर विक्रीत ४ टक्के तर वाईन विक्रीत १७. ०३ टक्के घट होती. विदेशी दारू विक्रीत मात्र २.५७ टक्के वाढ झाली. या महिन्यात सुद्धा कार्यकर्त्यांच्या पार्ट्या जोरात होत्या.