डिजिटल मार्केटिंगची भुरळ
करिअरच्या दृष्टीने वाढतोय कल
हर्षल भट, कॉलेज क्लब रिपोर्टर
डिजिटल शिक्षणाच्या युगात ई-बुक आणि ई- लर्निंग मोठ्या प्रमाणात विकसित होत आहेत. पेन पेपरची जागा आता ई-बुक्सने घेतली आहे. शैक्षणिक क्षेत्रासोबतच औद्योगिक क्षेत्र डिजिटल होताना दिसते आहे. कॉलेजमधील विद्यार्थ्यांमध्ये डिजिटल मार्केटिंगविषयी उत्सुकता निर्माण होत आहे. डिजिटल मार्केटिंगविषयी विद्यार्थ्यांमध्ये सेमिनारच्या माध्यमातून प्रबोधन केले जात असून बहुतांश कॉलेजमधील विद्यार्थीचा कल शिक्षणासोबतच डिजिटल मार्केटिंगकडे दिसून येत आहे.
औद्योगिक क्षेत्रातील वस्तुंना व उत्पादनाला प्रसिद्धी देण्यासाठी डिजिटल मार्केटिंगचा आधार घेतला जात आहे. तयार होणारे उत्पादन जास्तीत जास्त ग्राहकांपर्यंत पोहोचवण्यासाठी सोशल मीडियाच्या माध्यमातून प्रसिद्धी देण्याचे काम विद्यार्थी करत आहेत. कॉलेजमधील लहानशा इव्हेंटपासून ते उत्पादनच्या प्रसिद्धीपर्यंत सर्वच क्षेत्रात डिजिटल मार्केटिंगचा प्रभाव दिसून येत आहे. त्याचप्रमाणे शहरातील विविध कॉलेजमध्ये डिजिटल मार्केटिंगविषयी कार्यशाळा व चर्चासत्र आयोजित केले जात आहेत. तरुण वर्ग मोठ्या प्रमाणात फेसबुक, ट्विटर, इंस्टाग्राम यासारख्या माध्यमांवर पकड धरून असल्याने त्याचा डिजिटल मार्केटिंगसाठी उपयोग करता येऊ शकतो. त्याद्वारे आपल्या उत्पादनाला डिजिटल स्वरूप देऊन जास्तीत जास्त ग्राहकांपर्यंत पोहोचणे शक्य झाले आहे. सध्याची तरुण मंडळी अभ्यासासोबत कला, क्रीडा या क्षेत्राप्रमाणे आता डिजिटल मार्केटिंगकडे करिअर म्हणून पाहत आहेत. कमीत कमी वेळात उत्पादनाची प्रसिद्धी करून व्यवसाय वाढवण्यासाठी डिजिटल मार्केटिंग उपयुक्त ठरते आहे. प्रसिद्धीसाठी वस्तूचे डिजिटल स्वरूप फायदेशीर ठरते आहे.
---
डिजिटल मार्केटिंग हे प्रसिद्धीसाठी कुशल माध्यम आहे. वस्तूला डिजिटल स्वरूप देऊन जास्तीत जास्त ग्राहकांपर्यंत पोहोचणे शक्य झाले आहे. मी कॉमर्सची विद्यार्थिनी आहे, माझ्या क्षेत्राला डिजिटल मार्केटिंगची जोड देण्याचा प्रयत्न मी करते आहे. सोशल मीडियावर डिजिटल स्वरूपातील प्रसिद्धी फायदेशीर ठरते आहे.
- समृद्धी वाघमारे, विद्यार्थिनी
इंजिनीअरिंगशी निगडित असल्यामुळे औद्योगिक क्षेत्रासाठी उत्पादनाचे डिजिटल स्वरूप तयार करण्यास सुरुवात केली. आजच्या प्रसिद्धीच्या जगात डिजिटल मार्केटिंग हा उत्तम पर्याय आहे. अभ्यासासोबत स्वयंरोजगाराच्या दृष्टीने डिजिटल मार्केटिंग फायदेशीर आहे.
- आशिष चंद्रचूड, विद्यार्थी