स्पीडगन लेसर कॅमेरा, ब्रेथ अॅनालायझर, टिन्ट मशिन उपलब्ध
म. टा. खास प्रतिनिधी, नाशिक
शहर वाहतूक शाखेप्रमाणे महामार्ग सहायता केंद्राच्या पोलिसांना ओव्हर स्पीड मोजण्यासाठी लेसर गन, ब्रेथ अॅनालयाझर, काचेची पारदर्शकता मोजण्यासाठी वापरण्यात येणारे टिन्ट मशिन उपलब्ध करून देण्यात आले आहे.
महामार्ग पोलिसांसह शहर वाहतूक शाखेतील पोलिसांना सोमवारी (दि. ११) या आधुनिक साहित्याचा वापर करण्याबाबतचे प्रशिक्षण देण्यात आले. हे प्रशिक्षण पिंपळगाव बसंवत येथील महामार्ग सहायता केंद्र येथे देण्यात आले. याबाबत सूत्रांनी सांगितले की, घोटी, सिन्नर, पिंपळगाव-बसवंत येथील सहायता केंद्रांना प्रत्येकी एक वाहन उपलब्ध करून देण्यात आले आहे. पंधरा दिवसांपूर्वी ही वाहने महामार्ग पोलिसांना उपलब्ध झालीत. या वाहनांमध्ये आधुनिक यंत्रणा उपलब्ध असून, त्याचे प्रशिक्षण देण्याचे काम दिल्ली येथील एक्सपीरीओ टेक प्रा. लि. या कंपनीने सोमवारपासून हाती घेतले. महामार्ग पोलिसांनी सांगितले, की स्पीड लेसरगन कॅमेऱ्याचा वापर ओव्हरस्पीड टिपण्यासाठी होतो तर टिन्ट मीटर्स हे काचेची पारदर्शकता मोजते. मद्यपी वाहनचालकांना रोखण्यासाठी ब्रेथ अॅनालायझरचा वापर होतो. या साधनांमुळे हेल्मट न वापरता दुचाकी चालविणाऱ्या दुचाकीचालकांसह सीट बेल्टचा वापर न करणाऱ्या कारचालकांवर सुद्धा कारवाई करणे सहज झाल्याचे महामार्ग पोलिसांनी स्पष्ट केले.
अपघातांना आळा शक्य
नव्याने दाखल झालेल्या वाहनांमुळे राज्य आणि राष्ट्रीय महामार्गावरील गस्त घालण्याचे काम सुकर होणार आहे. महामार्गावरील हॉटेल्स धाबे यामुळे मद्यपी वाहनचालक, ओव्हर स्पीड ही समस्या मोठी असून, यामुळे अपघात सुद्धा होतात. आधुनिक यंत्रणेमुळे या घटनांना आळा घालण्याचे काम वेगात होईल, अशी अपेक्षा महामार्ग पोलिसांच्या वरिष्ठ अधिकाऱ्यांनी व्यक्त केली.