त्र्यंबकमध्ये स्वीकृत नगरसेवकाचा राजीनामा

म. टा. वृत्तसेवा, त्र्यबकेश्वर

सार्वत्रिक निवडणूक अवघ्या साडेतीन महिन्यावर आलेली असतांना स्वीकृत सदस्य राहुल फडके यांनी आपल्या नगरसेवकपदाचा राजीनामा दिला आहे. अर्थात दोनचार महिन्यांसाठी कोणा एकाची नगरसेवकपदाची हौस भागविण्यासाठी राजीनामा दिला असल्याचे बोलले जात आहे. मात्र आता जिल्हाधिकारी यांनी रिक्त पदावर कुणालाही घेता येणार नाही असे पत्र दिल्याने संगीत खुर्चीचा खेळ अंगलट आला आहे.

त्र्यंबक पालिकेत सतरा लोकनियुक्त सदस्य आणि दोन स्वीकृत सदस्य आहेत. ८ डिसेंबर २०१६ रोजी राहुल फडके यांना रिक्त झालेल्या स्वीकृत नगरसेवक पदावर नियुक्त करण्यात आले. फडके हे कैलास नागरी पतसंस्थेचे चेअरमन आहेत. त्यांना आठ महिने संधी दिल्यानंतर आणखी एकाची सोय लावण्यासाठी त्यांनी राजीनामा दिला. याप्रकरणी जिल्हाधिकाऱ्यांनी नगरपालिका पत्र पाठवून सार्वत्रिक निवडणूक सहा महिन्यांवर असल्याने नव्याने सदस्य निवडीची सभा घेता येणार नाही, असे स्पष्ट केले आहे. त्यांच्या या पत्राने नगरपालिकेत निवड नियुक्तीचा खेळ करण्यात स्वतःला किंगमेकर समजणाऱ्यांना चांगलाच धक्का बसला आहे. विद्यमान सभागृहास अवघे साडेतीन महिने बाकी आहेत. आतापर्यंत सहा नगराध्यक्ष आणि चार उपनगराध्यक्ष होऊन प्रभारी नगराध्यक्ष झाले आहेत. नगराध्यक्षा तृप्ती धारणे या १ जुलै रोजी पदावर निवडून आल्या आहेत. त्यांना अद्याप दीड महिना पूर्ण होत झालेला नाही. त्यातच विद्यमान उपनगराध्यक्ष अभिजीत काण्णव यांच्या राजीनाम्यासाठी दबावतंत्राचा वापर सुरू आहे.

हौस असेल तर निवडणूक लढावावी..

उपनगराध्यक्ष नव्याने निवडायचा आणि त्यांना प्रभारी नगराध्यक्ष कारायचे हा प्रयोग कार्यकाळाच्या शेवटच्या आठवड्यापर्यंत सुरू राहणार आहे. शहरात याबद्दल नापसंती व्यक्त होत आहे. आगामी निवडणुकीत मतदारांमधून थेट नगराध्यक्ष निवड होणार आहे. हौस असेल तर थेट निवडणूक लढवावी, असा नागरिकांच्या चर्चेचा सूर आहे. त्यातच उपनगराध्यक्षांनी राजीनामा दिला आणि जिल्हाधिकाऱ्यांनी निवडणूक घेता येणार नाही असे पत्र दिले तर मग ‘तेलही गेले आणि तुप गेले’ अशी अवस्था होऊ शकते.