शाळेत किलबिलाट सुरू
प्रवेशोत्सवाचा लुटला मनमुराद आनंद
म. टा. प्रतिनिधी, नाशिक
सोमवार सकाळचा शाळेचा पहिला दिवस विद्यार्थ्यांसाठी खासच होता. नाशिक जिल्ह्यातील शाळांनी चिमुकल्यांचे स्वागत ढोल-ताशांच्या गजरात, विद्यार्थ्यांचे औक्षण करून, चॉकलेटचा खाऊ, गुलाबपुष्प आणि शालेय साहित्य देऊन केले. प्रांगणात आकर्षक रांगोळी, फुगे व पताकांनी सजविलेले वर्ग यासह शाळेत वाजणारी बालगीते या प्रवेशोत्सवाचा विद्यार्थ्यांनी मनमुराद आनंद लुटला. शाळेत जल्लोषात झालेल्या स्वागतानंतर सर्व शाळेत चिमुकल्यांचा किलबिलाट सुरू झाल्याचे दिसून आले.
--
वाघ गुरुजी बालशिक्षण मंदिर
गंगापूररोडवरील मविप्रच्या वाघ गुरुजी बालशिक्षण मंदिरात विद्यार्थ्यांचे फुगे, पताका लावत पुष्प देत स्वागत करण्यात आले. लहान गटातील विद्यार्थ्यांचे औक्षण करत गोड खाऊ देण्यात आला. ईशस्तवन व स्वागतगीत यावेळी सादर करण्यात आले. प्रवेशोत्सवानिमित्त शाळेच्या प्रांगणासह वर्गातही रांगोळी रेखाटण्यात आली होती. यामुळे विद्यार्थ्यांचा उत्साह अधिक वाढल्याचे जाणवले. मुख्यध्यापिका पुष्पा लांडगे, शालेय समितीचे अध्यक्ष पांडुरंग मोगल, नगरसेविका स्वाती भामरे यांसह इतर मान्यवर प्रवेशोत्सवावेळी उपस्थित होते.
--
मनपा शाळा क्रमांक ११ व १२
मखमलाबाद नाका येथील मनपा शाळा क्रमांक ११ व १२ मध्ये पुस्तक दिंडी काढत प्रवेशोत्सव साजरा करण्यात आला. शाळेच्या प्रांगणात आंब्याच्या पानांचे तोरण लावण्यात आले होते. विद्यार्थ्यांसह पालकांचे मोठ्या उत्साहात स्वागत केले गेले. विद्यार्थ्यांना शाळेत प्रवेश करताना चॉकलेट देण्यात आले. मधल्या सुटीत शालेय पोषण आहारासोबतही गोड खाऊचे वाटप करण्यात आले. यावेळी मुख्याध्यापिका सुनिता बोरसे, शोभा खांगळ आणि वृषाली लचके यांसह इतर शिक्षकवृंद उपस्थित होते.
--
सागरमल मोदी शाळा
नाशिक एज्युकेशन सोसायटीच्या शिशुवृंद सागरमल मोदी या शाळेत प्रवेशोत्सवात विद्यार्थ्यांच्या पाऊलखुणा जपण्यात आल्या. विद्यार्थ्यांनी शाळेत प्रवेश करताच कुंकवाच्या पाण्यात त्यांचे पाय बुडवून त्यांच्या पावलांचे ठसे कागदावर घेण्यात आले. या ठशांचे जतन केले जाणार असून विद्यार्थी शाळा सोडतील, तेव्हा या पाऊलखुणांची फ्रेम भेट दिली जाणार आहे. प्रवेशोत्सवात विद्यार्थ्यांना पुष्प आणि चॉकलेट देत स्वागत केले गेले. सोसायटीचे कार्यवाह राजेंद्र निकम, मुख्यध्यापिका सुनिता पाटील यांसह इतर शिक्षकवृंद उपस्थित होते.
--
मखमलाबाद विद्यालय
मराठा विद्या प्रसारक समाजाच्या मखमलाबाद येथील छत्रपती शिवाजी माध्यमिक व उच्च माध्यमिक विद्यालयात नव्या शैक्षणिक वर्षाचे स्वागत मोठ्या उत्साहात केले गेले. प्रवेशोत्सवादरम्यान सर्व विद्यार्थ्यांचे जल्लोषात स्वागत करत सर्व शिक्षा अभियानांतर्गत मोफत पाठ्यपुस्तकांचे वाटप करण्यात आले. यावेळी होरायझन स्कूल कमिटीचे अध्यक्ष संजय फडोळ, प्राचार्य के. एस. गावले यांची प्रमुख उपस्थिती होती. विद्यालयातील जेष्ठ शिक्षक डी. बी. शिंदे यांनी विद्यार्थ्यांना व्यसनमुक्तीचे महत्त्व सांगितले. बालगीतांचे सादरीकरण करत विद्यार्थ्यांचे स्वागत करण्यात आले.
--
पेठे विद्यालय
नाशिक एज्युकेशन सोसायटी संचलित रविवार कारंजा येथील पेठे विद्यालयात शैक्षणिक वर्षाची सुरुवात प्रवेशोत्सव रॅलीने झाली. रॅलीत विद्यार्थ्यांनी शिक्षण हक्काचा प्रसार केला. वाजत गाजत निघालेल्या रॅलीने विद्यार्थ्यांचा उत्साह अधिक वाढला. या उत्साहात विद्यार्थ्यांनी वर्गात प्रवेश केला. विद्यार्थ्यांचे गुलाबपुष्प व मोफत पाठ्यपुस्तक देऊन स्वागत करण्यात आले. संस्थेचे उपाध्यक्ष चंद्रशेखर मोंढे, प्रभारी मुख्याध्यापक एकनाथ कडाळे, पर्यवेक्षिका कुंदा जोशी, शिक्षक प्रतिनिधी शशांक मदाने, क्रीडा शिक्षक राजेंद्र कापसे यावेळी उपस्थित होते.
--
शिशू विहार मराठी माध्यम शाळा
सेन्ट्रल हिंदू मिलिटरी एज्युकेशन सोसायटी संचलित शिशू विहार मराठी माध्यम या शाळेत सनईच्या सुरात विद्यार्थ्यांसह पालकांचे स्वागत केले गेले. गुलाबपुष्प देत खजूराचे चॉकलेट देऊन विद्यार्थ्यांचे स्वागत करण्यात आले. परिपाठाच्यावेळी नाट्यरुपातून शालेय माहिती विद्यार्थ्यांपर्यंत पोहोचविण्यात आली. विभाग प्रमुख वैशाली कुलकर्णी यांच्या मार्गदर्शनाखाली सर्व शिक्षकांनी प्रवेशोत्सवाचे संयोजन केले.
--
जनता विद्यालय
सातपूर येथील जनता विद्यालयात मोठ्या जल्लोषात प्रवेशोत्सव साजरा करण्यात आला. सरस्वती पूजन करत प्रवेशोत्सवाला प्रारंभ झाला. यावेळी संगीत शिक्षक व गीत मंच यांनी समूहगीत सादर केले. समूहगीताने विद्यार्थ्यांचा आनंद अधिक वाढला. विद्यार्थ्यांना पाठ्यपुस्तकासह गोड खाऊचे वाटप केले गेले. यावेळी विद्यालयाचे मुख्यध्यापक साहेबराव पाटील, नगरसेविका सीमा निगळ यांसह इतर मान्यवर उपस्थित होते.
--
मराठा हायस्कूल
मविप्रच्या मराठा हायस्कूलमध्ये प्रवेशोत्सव उत्साहात साजरा झाला. विद्यार्थ्यांना पुष्पगुच्छ देत प्रवेशद्वारावर स्वागत केले गेले. प्रवेशोत्सवात राजमाता जिजाऊ यांचा स्मृतिदिन साजरा करण्यात आला. विद्यार्थ्यांना पाठ्यपुस्तकांचे वाटप केले गेले. प्रांगणात काढलेल्या सुबक रांगोळ्यांनी विद्यार्थ्यांचे मने जिंकली. वर्गात लावण्यात आलेल्या पताका आणि फुलांच्या माळांनी शाळा अधिक आकर्षक दिसत होती. विद्यार्थ्यांनी शिक्षकांना नमन करत प्रवेशोत्सवचा आनंद लुटला. यावेळी संस्थेचे शहर संचालक नानासाहेब महाले, संमोहन तज्ज्ञ डॉ. शैलेंद्र गायकवाड, मुख्याध्यापक अरुण पवार यांची प्रमुख उपस्थिती होती.
--
शिशू विहार इंग्रजी माध्यम शाळा
सीएचएमइ सोसायटी संचालित शिशू विहार इंग्रजी माध्यम शाळेत मंगल तिलक लावत विद्यार्थ्यांचे स्वागत करण्यात आले. विद्यार्थ्यांना शाळेत पोहोचविण्यास आलेल्या पालकांचे सुवासिक अत्तर लावत स्वागत केले गेले. औक्षण केल्यानंतर विद्यार्थ्यांना पौष्टिक खाऊ म्हणून चिक्की देण्यात आली. शाळेच्या परिसरात विविध खेळणी, शालेय तक्ते, पपेट्स लावत सुशोभिकरण करण्यात आले होते. पालक विद्यार्थ्यांच्या हस्ते यावेळी वृक्षारोपणही करण्यात आले. यामुळे विद्यार्थ्यांच्या आनंदाला उधाण आले होते. विभाग प्रमुख नेहा सोमण यांच्या मार्गदर्शनाखाली प्रवेशोत्सव मोठ्या जल्लोषात साजरा करण्यात आला.
--
सारडा कन्या विद्या मंदिर
नाशिक एज्युकेशन सोसायटीच्या मा. रा. सारडा कन्या विद्या मंदिरात पाठ्यपुस्तके व संगणक पुस्तिका संचाचे वाटप प्रवेशोत्सवात करण्यात आले. पुष्पगुच्छ देत विद्यार्थिनींचे स्वागत करण्यात आले. विद्यार्थिनींना शालेय उपक्रमांसह अभ्यासक्रमांची माहिती देण्यात आली. सरस्वतीपूजन केल्यानंतर ईशस्तवन सादर करण्यात आले. मुख्यध्यापिका आशा डावरे, उपमुख्याध्यापिका मुक्ता सप्रे, शिक्षक प्रतिनिधी वृषाली पाटील यांसह इतर मान्यवर यावेळी उपस्थित होते.