म. टा. वृत्तसेवा, नाशिकरोड
शिखरेवाडी मैदानावरील स्वयंसिद्धा हॉल येथील मोठ्या दोन झाडांची सर्रास कत्तल करण्यात आली आहे. विशेष म्हणजे या वृक्षतोडीचा महापालिकेच्या उद्यान विभागाला थांगपत्ताही नाही.
शिखरेवाडी मैदनात असलेल्या महापालिकेची इमारत स्वयंसिद्धा महिला मंडळाच्या ताब्यात आहे. या इमारतीभोवती मोठ्या प्रमाणात वृक्ष आहेत. यापैकी गुलमोहराच्या दोन वृक्षांच्या फांद्या मंगळवारी (दि. २४) मोठ्या प्रमाणात छाटण्यात आल्या. या वृक्षतोडीबद्दल महापालिकेच्या उद्यान विभागाच्या अधिकाऱ्यांकडून मात्र कानावर हात ठेवण्यात आले. तोडलेल्या फांद्या शेजारीच असलेल्या जॉगिंग ट्रॅकच्या कंपाउंडवर आणि ट्रॅकवर टाकण्यात आल्या. महापालिकेच्या नाशिकरोड विभागाचे उद्यान निरीक्षक इजाज शेख यांनाही या प्रकाराबाबत आणि परवानगीबाबत काहीही माहिती नसल्याचे त्यांनी सांगितले. खुद्द उद्यान निरीक्षकांनीच वृक्षतोडीच्या परवानगीबाबत माहिती नसल्याने महापालिकेचा उद्यान विभागच या प्रश्नी गंभीर नसल्याची चर्चा नागरिकांमध्ये सुरू आहे.