बागेश्री पारनेरकर, कॉलेज क्लब रिपोर्टर
'मी सावरकर' या अभिनव खुली वक्तृत्व स्पर्धेचा पारितोषिक वितरण सोहळा २७ मे रोजी फर्ग्युसन महाविद्यालयात झाला. यात पाचवी ते आठवी या गटात नाशिकच्या सोहम कुलकर्णी याने द्वितीय क्रमांक मिळवला, तर महाविद्यालयीन गटात बागेश्री पारनेरकर आणि मधुरा घोलप याने उत्तेजनार्थ पारितोषिक मिळवले.
राज्यसभेचे खासदार आणि ज्येष्ठ अर्थतज्ज्ञ सुब्रमण्यम स्वामी प्रमुख व्याख्याते होते. स्वानंद चॅरिटेबल ट्रस्ट पुणे, हिंदू हेल्पलाइन, डेक्कन एज्युकेशन सोसायटी, शिवसंघ प्रतिष्ठान यांनी ही स्पर्धा आयोजित केली होती. या स्पर्धेचे वैशिष्ट्य म्हणजे व्हाट्सअपच्या माध्यमातून व्हिडीओ पाठवून ही स्पर्धा घेण्यात आली. स्पर्धेत भारताबरोबर भारताबाहेरूनही अनेक स्पर्धक सहभागी झाले होते. स्पर्धेचे हे पहिले वर्ष होते. साहित्यिक सावरकर, विज्ञाननिष्ठ सावरकर, समाजसुधारक सावरकर, द्रष्टे सावरकर, योद्धा सावरकर, हिंदुत्ववादी सावरकर असे या स्पर्धेचे विषय होते. एकूण सहा गटांत ही स्पर्धा झाली. पाचवीच्या विद्यार्थ्यांपासून ८० वर्षांच्या ज्येष्ठ नागरिकांनी स्पर्धेत आपला सहभाग नोंदवला.
स्पर्धेसाठी शरद पोंक्षे, नितीश भारद्वाज, राहुल सोलापूरकर, प्रवीण जाधव, प्रवीण तरडे, योगेश सोमण, श्रीरंग गोडबोले, मिलिंद वेर्लेकर, अरविंद रानडे, प्रकाश पाठक, निपूण धर्माधिकारी, डॉ. पिंपळखरे, कॅप्टन नीलेश गायकवाड, सुनील अभ्यंकर, मंदार परळीकर, धनश्री लेले यांनी परीक्षक म्हणून काम पाहिले.