थंडीचा कडाका वाढणार
...
म. टा. प्रतिनिधी, नाशिक
गेल्या पंधरा दिवसांपासून नाशिककरांना थंडीची चाहूल लागली असून, पारा तीन अंश सेल्सिअसने घरसला आहे. सोमवारी १४.८, तर कमाल २९.६ अंश सेल्सिअस तापमानाची नोंद झाली. त्यामुळे गारठा जाणवत आहे. आर्द्रतेचे प्रमाणही घटल्याने थंडीचा कडाका येत्या काही दिवसांत आणखी वाढणार असल्याची शक्यता हवामान विभागाने वर्तवली आहे.
जिल्ह्यात पावसाने ऑक्टोबर अखेरपर्यंत हजेरी लावण्याने यंदा थंडी अधिक राहणार असून, सोमवारी पारा अचानक तीन अंशांनी घसरल्याने गारठा वाढला आहे. आर्द्रताचे प्रमाण पहाटे ७७, तर सायंकाळी ४५ टक्के इतके असल्याने दिवसादेखील गारवा कायम होता. त्यामुळे स्वेटर आणि उबदार कपडे बाहेर निघाल्याचे दिसून आले. सायंकाळनंतर पुन्हा गारव्यात वाढ झाली. यामुळे व्यायामासाठी जॉगिंग ट्रॅकवर गर्दी होताना दिसत आहे.
गेल्या आठवड्यात तापमान वाढण्यास सुरुवात झाली. मात्र नाशिककर ऊन-गारव्याची अनुभती घेत होते. शहरातील वाऱ्याचा मंदावलेला वेग पहाता, पुढील काही दिवसांत थंडीची लाट येण्याची शक्यता आहे. नोव्हेंबरच्या प्रारंभीच राज्यातील सर्वात कमी तापमानाची नोंद नाशिकमध्ये झाल्याने गेल्या वर्षीनुसार यंदाही तापमानात मोठी घट होणार असल्याचे हवामान विभागाने सांगितले. सन २०१८ मध्ये नोव्हेंबरच्या दुसऱ्या आठवड्यात शहरातील किमान तापमान ११ अंशांपर्यंत पोहोचले होते. यंदा तापमान १४ अंशांपर्यंत घटले असून, पुढील चार दिवसांत १० अंशांपर्यंत पारा घसरण्याची शक्यता आहे.
...
चार दिवसांचे तापमान
दिनांक........ किमान...... कमाल
१८ नोव्हेंबर- १४.८ - २९.६
१७ नोव्हेंबर- १७.६ - ३०.०
१६ नोव्हेंबर- १८.३ - २९.९
१५ नोव्हेंबर- १६.२ - २७.९