म. टा. वृत्तसेवा, देवळाली कॅम्प
डीजेवर बंदी असल्याने यंदा शहरात पारंपरिक संबळ, ढोल-ताशा, बँजो अन् लेझीमच्या तालावर ठेका धरत देवळालीकरांनी भावपूर्ण वातावरणात आपल्या मनातील इच्छा गणरायाच्या कानात सांगून मनमोकळे करीत निरोप दिला.
सर्वच प्रमुख मंडळांच्या दुपारपासून निघालेल्या मिरवणुकींनी शहर गजबजून गेले होते. संसरी येथील दारणा नदीच्या तीरावर सकाळपासून घरगुती गणेशमूर्तींचे विसर्जन सुरू होते. लहान मंडळांपासून सुरू झालेल्या मिरवणुका अखेर साडेअकराच्या सुमारास संसरी नदीतटावर दाखल होत गणेशमूर्तींचे विसर्जन करण्यात आले. तत्पूर्वी शहरातून देवळालीचा राजा गवळीवाडा, पाषाण तरुण मित्रमंडळ, सहाव्या गल्लीचा राजा आदींसह अन्य मंडळांच्या मिरवणुका शहर परिसरातून काढण्यात आल्या. तरुण मित्रमंडळाने मंडपाच्या आवारात आर्केस्ट्राचे आयोजन करून उशिरा मूर्तीचे विसर्जन केले. लामरोड, शिंगवे बहुला येथील मंडळाच्या मिरवणुकांमध्ये संबळाच्या तालावर गणरायाला निरोप देण्यात आला. मिरवणुकीत पाषाण तरुण मंडळाचे लेझीम पथक आकर्षण ठरले. डीजेला परवानगी नसल्याने काही मंडळांनी दुपारीच विसर्जन केले. शहरात ११ मिरवणुका, भगूरमध्ये ७, नानेगाव व लहवितला प्रत्येकी एक मिरवणूक शांततेत उत्साहात पार पडली. पोलिस उपायुक्त श्रीकृष्ण कोकाटे, सहायक आयुक्त मोहन ठाकूर व वरिष्ठ निरीक्षक अनिल पवार यांनी बंदोबस्त ठेवला होता. कॅन्टोन्मेंट बोर्ड व संसरी ग्रामपंचायतीतर्फे निर्माल्य संकलनासाठी नदीकिनारी व्यवस्था करण्यात आली होती.
'देव द्या, देवपण घ्या'ला प्रतिसाद
येथील रोटरी ज्येष्ठ नागरिक संघाने पुढाकार घेत श्रीमती विमलाबेन खिमजी तेजुकाया महाविद्यालय व जिजाऊ ब्रिगेडच्या सहकार्याने दारणातीरावर 'देव द्या, देवपण घ्या' असे आवाहन करीत मूर्ती संकलन व निर्माल्य संकलनाचा उपक्रम राबविला. यामध्ये सुमारे १५०० मूर्ती संकलित करण्यात आल्या. एसव्हीकेटी महाविद्यालयाचे प्राचार्य डॉ. विजय मेधने, प्रा. सुनीता आडके, प्रा. सुनील आहेर, प्रा. प्रकाश पगारे, रोटरी ज्येष्ठ नागरिक संघाच्या कौशल्या मुळाणे, अध्यक्ष पुरुषोत्तम गुप्ता, उज्ज्वला देशमुख, नंदा भुतडा, शांतिलाल भुतडा आदींनी सहभाग घेतला. अनेक नागरिकांनी अंगणातचं बाप्पांचे विसर्जन केले.