मेगा ब्लॉकमुळे पर्यटनावर विरजण
म. टा. वृत्तसेवा, मनमाड
मुंबईच्या ठाकुर्ली रेल्वेस्थानकावर विकास कामांसाठी बुधवारी घेण्यात येणाऱ्या मेगा ब्लॉकमुळे १६ रेल्वेगाड्या रद्द करण्यात आल्याने प्रवासी वर्गात तीव्र संताप व नाराजी पसरली आहे. २५ डिसेंबर म्हणजे नाताळ सणाच्याच दिवशी ब्लॉक घेण्यात आल्याने रेल्वे वाहतूक विस्कळीत होणार आहे. परिणामी प्रवाशांत असंतोष पसरला आहे. अनेकांचे नियोजन यामुळे कोलकलणार आहे.
बुधवार २५ रोजी मुंबई नजीक ठाकुर्ली रेल्वे स्थानकात पादचारी पुलाचे गर्डर उभारण्याचे काम हाती घेण्यात आल्याने सकाळी पावणे दहा ते दुपारी पावणे दोनपर्यंत पाच तासांचा मेगा ब्लॉक घेण्यात आला आहे. यामुळे रेल्वे वाहतुकीवर त्याचा विपरीत परिणाम झाला आहे. नाताळ सणानिमित्त बाहेरगावी जाणाऱ्या तसेच शाळांच्या सुट्यांमुळे सहलीला निघू इच्छिणाऱ्या नागरिकांना रेल्वे वाहतूक बंद असल्याने अनेक अडचणींना सामोरे जावे लागण्याची तसेच रेल्वेऐवजी खासगी वाहनाने जाण्याची वेळ आली आहे. सण, सुट्यांचा विचार करून मेगा ब्लॉकचा विचार करायला हवा होता, अशा शब्दात प्रवाशांनी नाराजी व्यक्त केली आहे.
१६ गाड्या रद्द
मनमाडहून सुटणाऱ्या राज्यराणी, पंचवटी, गोदावरी एक्स्प्रेससह तब्बल १६ रेल्वे गाड्या बुधवारी रद्द करण्यात आल्या आहेत. नागपूर दादर सेवा ग्राम एक्स्प्रेस, जनशताब्दी एक्स्प्रेस, भुसावळ मुंबई पॅसेंजर या गाड्यांना देखील मेगा ब्लॉकचा फटका बसला आहे. मुंबईकडे जाणाऱ्या व मुंबईकडून येणाऱ्या दोन्ही कडच्या रेल्वे गाड्यांची वाहतूक यामुळे ठप्प होणार असल्याने प्रवाशांचे हाल होण्याची चिन्हे आहेत.