तीस पात्र, अकरा रिक्त!
वनरक्षकांची भरती अंतिम टप्प्यात
म. टा. प्रतिनिधी, नाशिक
नाशिक वनवृत्तातील ४४ रिक्त वनरक्षक पदांच्या भरतीत सर्व चाचणीतून अवघे तीस उमेदवार पात्र ठरले असून, अकरा जागा रिक्त राहणार आहेत. अंतिम टप्प्यात आलेल्या उमेदवारांची वैद्यकीय तपासणी सुरू असून, लवकरच अंतिम निकालाद्वारे नियुक्तीचे आदेश निघणार आहेत. २० सप्टेंबरपर्यंत आदेश देण्याची मुदत असल्याने गुरूवारपर्यंत वनरक्षकांची भरतीप्रक्रिया संपेल, असा अंदाज वर्तविण्यात आला आहे.
वन विभागात सर्व्हेक्षक पाठोपाठ वनरक्षक भरतीच्याही जागा रिक्त राहणार, यावर शिक्कामोर्तब झाला आहे. ही भरती अंतिम टप्प्यात आल्याने अवघ्या तीस उमेदवारांची यादी तयार करण्यात आली आहे. काही प्रवर्गात उमेदवारच नसल्याने या जागा रिक्त राहणार आहेत. लेखी परीक्षेतून १७५ उमेदवार शारीरिक व कागदपत्र तपासणीकरिता पात्र ठरले. त्यातून १२४ उमेदवार धाव चाचणीकरिता पात्र ठरले. शेवटच्या चाल चाचणीकरिता ३१ गुणवत्ता, तर ११ प्रतिक्षा यादीतील उमेदवार पात्र ठरले. तेव्हाच वनरक्षकांच्या जागा रिक्त राहणार, ही शक्यता वर्तविण्यात आली. अखेरीस चाल चाचणीचा निकाल विचारात घेतल्यानंतर तीस उमेदवारांना वैद्यकीय तपासणीच्या सूचना केल्या आहेत. या तपासणीचे अहवाल भरती निवड समितीकडे आल्यानंतर अंतिम यादीनुसार नियुक्ती आणि हजर होण्याचे आदेश दिले जातील, असे समितीचे सचिव शिवाजी फुले यांनी सांगितले.
- -
विभागनिहाय पदांची माहिती
विभाग भरायची पदे पात्र उमेदवार
नाशिक पूर्व विभाग २ १
नाशिक पश्चिम विभाग १२ १०
अहमदनगर ३० १९
एकूण ४४ ३०