म. टा. खास प्रतिनिधी, नाशिक
नोकरीचे आमिष दाखवून पाच लाख ८७ हजारास गंडा घालणाऱ्या तिघांना प्रथम वर्ग न्यायदंडाधिकारी जी. के. आर टंडन यांनी तीन वर्ष सश्रम कारावास आणि प्रत्येकी दहा हजार रूपये दंडाची शिक्षा सुनावली. अजिम गुलाम शेख (रा. पखाल रोड), जहिर बनेमिया शेख (रा. चित्तीया कॉलनी, वडाळारोड) आणि राहुल कैलास सहाणे (रा. आंबेडकर कॉलनी, रेडक्रॉस हॉस्पिटलमागे) अशी शिक्षा सुनावण्यात आलेल्या आरोपींची नावे आहेत.
या प्रकरणी मजहर इस्माईल शेख (रा. जेएमसीटी कॉलेज जवळ, वडाळारोड) यांनी तक्रार दिली होती. २९ जून २०१६ रोजी आरोपी यांनी मजहर शेख यांना गाठून मुलास चांगल्या पगाराची नोकरी लावून देण्याचे आश्वासन दिले होते. त्यानुसार मजहर शेख यांच्या घरी आरोपींनी ५ लाख ८७ हजार रूपयांची रोकड स्वीकारली होती. अनेक दिवस उलटूनही नोकरी न मिळाल्याने मजहर शेख यांनी आरोपींकडे पैशांचा तगादा लावला. मात्र, संबधितानी हातपाय तोडण्यासह जीवे ठार मारण्याची धमकी दिली. आपली फसवणूक झाल्याचे लक्षात येताच मजहर शेख यांनी मुंबईनाका पोलिस ठाणे गाठून तक्रार दाखल केली होती. या प्रकरणी फसवणुकीचा गुन्हा दाखल करण्यात आला होता. गुह्याचा तपास तत्कालिन सहाय्यक निरीक्षक केतन राठोड यांनी केला. सरकारतर्फे अॅड. सी. एस. पगारे यांनी काम पाहिले. समोर आलेल्या साक्षी पुराव्यांआधारे न्यायालयाने तिघांना तीन वर्ष सश्रम कारावास व दंडाची शिक्षा सुनावली. खटला यशस्वीतेसाठी पोलिस नाईक एम. एन. मोरे आणि शिपाई व्ही. एम. सोनवणे यांनी काम पाहिले.