माथेफिरूच्या हल्ल्यात तीन बालके गंभीर

म. टा. वृत्तसेवा, मनमाड

चांदवड तालुक्यातील वडनेरभैरवनजीक नारायणगाव येथे एका माथेफिरू तरुणाने एकाच कुटुंबातील तीन लहान भावंडांवर कुऱ्हाडीने वार करीत गंभीर जखमी केल्याची घटना रविवारी रात्री घडली. मनीषा गांगुर्डे (वय १२), वैशाली गांगुर्डे (१०) आणि समाधान गांगुर्डे (९) अशी या जखमी बालकांची नावे आहेत. यात मनीषा गंभीर जखमी आहे. तिच्यावर पिंपळगाव येथे उपचार सुरू आहेत. संशयित हल्लेखोराला पोलिसांनी ताब्यात घेतले आहे. यापूर्वी नांदगाव तालुक्यात हिंगणडेहरे येथे मनोरुग्णाच्या कुऱ्हाड हल्ल्यात तीन जण ठार झाल्याची घटना ताजी असतानाच आता चांदवड तालुक्यात हा प्रकार घडल्याने खळबळ उडाली आहे.

नारायणगाव येथे रविवारी रात्री संतोष गोविंद पवार (वय ३०) या माथेफिरूने शेजारच्या घरात कुऱ्हाडीसह प्रवेश करून घरात तिन्ही बालकांच्या डोक्यावर वार केला. या वेळी घरात मोठी व्यक्ती कोणीच नव्हती. हल्ल्यात मनीषा गांगुर्डे गंभीर जखमी झाली आहे. या प्रकरणी मुलांचे वडील बाबाजी गांगुर्डे यांनी वडनेरभैरव पोलिस ठाण्यात फिर्याद दिल्यानंतर पोलिसांनी माथेफिरू संतोष पवारला ताब्यात घेतले आहे. पोलिस उपअधीक्षक डॉ. राहुल खाडे यांनी घटनास्थळी भेट दिली. माथेफिरू पवारला वैद्यकीय तपासणीसाठी नाशिक येथे पाठवण्यात आले आहे.

संशयित नांदगावचा

दरम्यान, संशयित संतोष मजुरी करत असून, तो मनोरुग्ण असल्याचा पोलिसांचा प्राथमिक अंदाज आहे. संतोष मूळचा नांदगाव तालुक्यातील असून, तो हिंगणडेहरेजवळच्या चिंचविहीर येथील असल्याचे समजते. आई व मुलासोबत तो नारायणगाव येथे फिर्यादी बाबाजी गांगुर्डे यांच्या घराशेजारी राहत आहे.