आफ्रिकन विद्यार्थ्यांना तीन लाखांचा गंडा; नाशिकमधील घटना

नाशिक : भारतीय संस्कृती जाणून घेत इथे उच्च शिक्षणासाठी आलेल्या दक्षिण आफ्रिकेतील विद्यार्थ्यांना पावणे तीन लाखांना गंडा घातल्याचा धक्कादायक प्रकार समोर आला आहे. भाड्याने घर देण्यासाठी आठ विद्यार्थ्यांकडून अनामत रक्कम आकारून त्याचा अपहार करण्यात आला. यानंतर विद्यार्थ्यांना जीवे मारण्याची धमकी देण्याचा प्रयत्न झाला. याप्रकरणी संशयितांविरुद्ध गुन्हा दाखल झाला असून, मुंबई नाका पोलिसांनी निखिल प्रकाश मुदिराज या तरुणाला अटक केली आहे.

दक्षिण अफ्रिकेतील सेंडीन टॉन येथील रहिवाशी मोसेस टोटली संग बाबालोला (वय २१) हा तरुण सध्या गंगापूररोड भागात वास्तव्यास आहे. याने खोली भाड्याने घेण्यासाठी बुकिंग एजंटकडे व्यवहार केला. मात्र, त्यामध्ये फसवणूक झाल्याची फिर्याद त्याने पोलिसांत दिली आहे. त्यानुसार मुंबई नाका पोलिसांनी संशयित गणेश पांडुरंग पाटील (वय २५, रा. खुटवडनगर) आणि निखिल प्रकाश मुदिराज (वय ३७, रा. गोविंदनगर) यांच्याविरोधात गुन्हा दाखल केला आहे. या दोघांचे शिंगाडा तलाव येथील श्री. जी. युनिपार्कमध्ये कार्यालय असून, ते प्रॉपर्टी व्यवहारातील दलाल आहेत.

बाबालोलासहित त्याचे मित्र शिक्षणासाठी नाशिकमध्ये वास्तव्यास आहेत. हे सर्वजण व्यवसाय व्यवस्थापन पदवीचा अभ्यास त्र्यंबकेश्वर रस्त्यावरील खासगी विद्यापीठात करीत आहेत. त्यांची फसवणूक ५ सप्टेंबरपासून २२ नोव्हेंबरपर्यंत झाल्याचे उघड झाले आहे. संशयित पाटील व मुदिराज यांनी सोमेश्वर परिसरात भाड्याने खोली घेऊन दिली. मात्र, या आफ्रिकन विद्यार्थ्यांकडून घेतलेली डिपॉझिटची रक्कम घरमालकाला दिली नाही. यामुळे घरमालकाने विद्यार्थ्यांकडे पैशांची मागणी केली. याबाबत बाबालोलासहित त्याच्या मित्रांनी दोन्ही संशयितांना विचारणा केली असता त्यांनी उडवाउडवीची उत्तरे दिली. तर, २१ नोव्हेंबर रोजी बाबालोला याला फोन करून जीवे मारण्याची धमकी दिली. ही बाब परिमंडळ एकचे उपायुक्त किरणकुमार चव्हाण आणि मुंबई नाका पोलिस ठाण्याचे वरिष्ठ निरीक्षक सुनिल रोहकले यांच्यापर्यंत पोहोचली. त्यांनी प्रकरणाची खात्री करून फिर्यादीच्या तक्रारीनुसार गुन्हा दाखल करण्याचे आदेश दिले. या घटनेमुळे शहरात वास्तव्यास असलेल्या परदेशी विद्यार्थी व नागरिकांच्या सुरक्षेसह त्यांच्या आर्थिक व्यवहारांच्या सुरक्षेसंदर्भात प्रश्नचिन्ह उपस्थित झाले आहे. पोलिसांनी याप्रकरणी सखोल तपास करणे अपेक्षित असून, या दलालांचे रॅकेट उघडकीस आणण्याची मागणी नागरिकांकडून होत आहे.

...असे झाले ‘व्यवहार’

फिर्यादी बाबालोला याने संशयित गणेश पाटील याला १७ हजार ई-पेमेंट केले. तर, संशयित मुदिराजला ४३ हजार रोख रक्कम दिली. तर, बाबलोला याचा मित्र डरायस गोल याने २५ हजार, डेटीमले एबार याने १० हजार, डेविड डेमीने ५५ हजार, बुसीने ५५ हजार, बरनाडोने ४२ हजार, लॉरिनने ३० हजार आणि नोबर्ट याने ६० हजार रुपये दोन्ही संशयितांना दिले. हे एकूण २ लाख ७७ हजार रुपये वेळोवेळी घेत संशयितांनी अपहार केला. या व्यवहारांची माहिती आणि अपहाराच्या रकमेसंदर्भात पोलिस तपास करीत आहेत. संशयित मुदिराजची चौकशी सुरू असल्याचे मुंबई नाक्याच्या गुन्हे पथकाने सांगितले.