मालेगावात वाहतूक पोलिसांच्या नियोजनाचा अभाव
म. टा. वृत्तसेवा, मालेगाव
विधानसभा निवडणुकीसाठी उमेदवारी अर्ज दाखल करण्याचा शुक्रवारी अखेरचा दिवशी शहरात प्रमुख उमेदवारांकडून जोरदार शक्तीप्रदर्शन करण्यात आले. या दरम्यान शहर वाहतूक पोलिसांकडून कोणतेही नियोजन करण्यात आले नसल्याने तब्बल एक तास शहरातील प्रमुख रस्त्यांवर वाहतूक कोंडीचा नागरिकांना सहन करावा लागला.
शुक्रवारी मालेगाव बाह्य मतदारसंघातून शिवसेना युतीचे दादा भुसे व काँग्रेस आघाडीचे डॉ. तुषार शेवाळे हे उमेदवारी अर्ज दाखल करणार होते. याविषयी वाहतूक पोलिस प्रशासनास पूर्वकल्पना असताना देखील रस्त्यावर मात्र वाहतूक नियोजनाचा अभाव दिसून आला. शिवाजी पुतळा येथून मोसमपूल मार्गे ना. भुसे यांचा तर सटाणा रोडमार्गे शेवाळे यांचा रोड शो दुपारी एकामागोमाग एक असे मोसमपूल सर्कल येथे दाखल झाल्याने एकच वाहतूक कोंडी झाल्याचे पाहायला मिळाले. शहरातील रस्त्यांची पावसामुळे चाळण झाली आहे.अतिक्रमण व बेशिस्त वाहनचालकांमुळे रस्त्यावरील अडचणी आधीच वाढल्यात. त्यात शुक्रवारी वाहतूक कोंडीत सापडून अनेकांना मनस्ताप सहन करावा लागला.
प्रमुख उमेदवारांचे शक्तीप्रदर्शन होणार असल्याने वाहतूक मार्गात बदल करणे गरजेचे होते. मात्र अशा कोणत्याही उपाय योजना करण्यात न आल्याने कॅम्प रोड व सटाणा रोडवरील वाहतूक एकेरी झाली व वाहतुकीचा खोळंबा झाला. याचवेळी शहरातील सकाळ सत्रातील शाळांची सुट्टी झाल्याने सायकल व पायी जाणा-या विद्यार्थ्यांना गर्दीतून वाट काढावी लागली. मात्र रस्त्यावर कुठेही वाहतुकीचे नियोजन दिसले नाही यामुळे वाहनचालकांनी संताप व्यक्त केला. अखेर मिळेल त्या मार्गाने वाट काढीत नागरिकांनी वाहतूक कोंडीतून आपली सुटका करून घेतली.