नाशिकच्या 'या' तालुक्यात लोकांमध्ये बिबट्याची दहशत; वनविभागाने लावला परिसरात पिंजरा

म. टा. वृत्तसेवा, कळवण

तालुक्यातील पाळे खुर्द शिवारात बिबट्याचे दिवस दर्शन झाल्याने नागरिकांमध्ये भीती पसरली आहे. सकाळी पाळे खुर्द येथील सुनील दादासाहेब पाटील यांच्या घरासमोर बिबट्याचा नजरेस पडला. पाटील यांनी बिबट्याचे मोबाइलमध्ये चित्रण केले आहे. त्यांच्या तक्रारीनंतर वनविभागाने या परिसरात पिंजरा लावला आहे. बुधवारी सकाळी सुनील पाटील यांच्या घरासमोर बिबट्याचा मुक्त संचार सुरू होता. सकाळी रिमझिम पाऊस झाल्याने सर्वजण घरात होते. म्हणून मोठा अनर्थ टळला. यंदा पावसाने दडी मारल्याने पेरण्यांना उशीर झाला आहे. असे असतांना बिबट्याच्या दहशतीमुळे शेतकऱ्यांसह मजुरांमध्ये भीती पसरली आहे. वनरक्षक सुचिता पाटील यांनी घटनास्थळी पाहणी केली. सुनील पाटील यांच्या गिरणा नदीकाठच्या उसाच्या शिवारात वनपरिक्षेत्र अधिकारी वसंत पाटील व वनपाल निकम यांच्या मार्गदर्शनानुसार या भागात तत्काळ पिंजरा लावण्यात आला आहे.